Mizoram Governor Lt.Gen. (Retd.) Nirbhay Sharma PVSM, UYSM, AVSM, VSM chuan vawiin khan Aizawl khawpui hmar lama hmun hrang hrang a fang chhunzawm leh a, Gilead Special School, Synod Hospital, TNT Home, Kendriya Vidyalaya School, Pushpak Gurudwara leh Mizoram State Cancer Institute te a tlawh a ni.

Governor chuan Gilead Special School chu a tlawh hmasa berin, Spastic Society of Mizoram Chairperson Pi Zokhumi Vankung hovin an lo dawngsawng a, zirlai naupangte chuan lam hrang hrang an lo entir a ni. Governor chuan thu sawiin, zirlai naupangte chu piangphunga rualbanlo anga in ngai lova, theihna danglam bik an nei tih hre reng turin a chah a. An zirtirtute thawhrimna nen hmalam eng tak an neih thu a sawi a ni. He school hnenah hian infiamna bungrua a pe nghal a ni.

Synod Hospital-ah hian Director Dr. LH Thanga Singson kaihhruaiin inkhawmna an nei a. Governor Nirbhay Sharma chuan Synod Hospital-in pawl hrang hrangte nena a thawhhona leh mipui tana an rawngbawlna chu ropui a tih thu a sawi a. Aizawl khawpuia damdawiin leh thawktu mithiamte chu a khat tawka inrawnkhawmna neia, an thiamnate intawm tura a duh thu a sawi a ni. Cancer, HIV leh ruihhlo avangte a harsatna tam lutuk chu a vei thu sawiin, kohhran leh damdawiin ten hemi lam hawi zawnga thui tak hma an lak theih a rin thu a sawi a ni. Director chuan Synod Hospital hnuaia inekawlna hrang hrang te leh an hmachhawp te a tarlang a ni.

Muanna Veng-a TNT Home chu Governor chuan tlawh lehin an hmunhma te a fangkual a. TNT Founder Dr. Sangthankima nen inkawmna hun hmangin, Governor chuan an hnathawh leh an mihring puite tana an inpekna chu ropui a tih thu sawi a, TNT Home chu thangzel tur leh an mahni anga in enkawlna hmun te lo pung zel turin a duh thu a sawi a ni. TNT Home tana tih theih a nei a nih phawt chuan, tanpui a inhuam thu a sawi a. Dr. Sangthankima hnenah hian an nitin mamawh tur thilpek a pe a ni.

Kendriya Vidyalaya School chu tlawh lehin Governor hian zirlai naupangte hnena thusawina a nei a. Zirlai naupangte chu kan ram hruaitu turte an nih angin, tun hi hun pawimawh a ni, a ti a. Zirlaibu ringawta rilru pe lo tur leh thil chi hrang hranga tawnhriat neih a that zia a sawi a. Khawvel inher danglam chak tak karah mi naran tan dinchhuah a har tawh thu sawiin, ramdang kan el phak loh chuan kan hnufual bik a hlauhawm a ni, a ti. Governor hi KV School-ah hian Project Pushpak Chief Engineer Brigadier Birender Singh leh Principal Mukesh Kumar te’n an lo hmuak a ni.

Mizoram State Cancer Institute (MSCI) Director Dr. Zoramthanga leh Dr. Jerry L. Pautu, Head, Department of Medical Oncology te chuan Governor chu MSCI hmunhma an fangkual pui a. Health & family Welfare Department hnuaia cheng vbch. 45 senna tur Tertiary Care Cancer Centre sak mek chu enfiah in, Governor chuan building sak lai mek chu a hun leh sum ruahman lawk anga zo turin a duh thu a sawi a ni.

Governor hian Thuampuia Pushpak Guruwara a tlawh tel bawk a ni.