Vawiin hian Serchhip District AH & Vety Complex, State Vety Dispensary, Serchhip P&E Veng ah National Livestock Missions hnuaia vawk rulhut damdawi pek beihpui thlakna (Launching Programme of Deworming in Pigs) hun hawnna neih a ni a. Rulhut laka kan vawk vulhte venhim dan leh a damdawi pek dan te inzirtir a nih bakah vawk thahnem tak rulhut damdawi pek nghal an ni.

He hun kaihruaitu Dr. Lalnghinglova, District Ah & Vety Officer chuan, National Livestock Missions hnuaiah hian Sub-Missions pali a awm a, chung zinga pakhat chu Northeast State teah kalpui niin he Sub Missions hnuaiah hian Control of Parasites a tel a. Chumi hmalakna hnuaiah chuan kan ran vulhte rulhut damdawi tha taka pek leh rulhut pai ran enkawl hna kalpui niin Mizoram sawrkar pawhin hei hi a ngai pawimawh a, November ni 2 hi Deworming Day angin a hmang ta ani , a ti.

Ran hrisel, thianghlim leh thang duh nei turin rulhut damdawi a hun takah dik taka kan pek a ngai a, tin kan ran vulhte thianghlimna leh an chenna tur in tha leh fai kan neih dan a zira heng natna te hi pumpelh thei kan nih avangin ran vulhtuten ran in kan enkawl that a tul hle bawk a ni, a ti.

He hunah hian Dr. R. Lalmakthanga, Chief Vety Officer chuan ran in sak dan leh thianghlim taka enkawl dan ranvulhtu kalkhawmte a zirtir bakah Dr. Biaklianzuali, Vety Officer, Chhingchhip chuan Vawk rulhut damdawi pek dan leh inven dan sawifiahna hun a hmang bawk.

He hunah hian Chhiahtlang, Chhingchhip, Khawlailung leh Serchhip atangin vawk vulhtu engemawzat an tel a, kalkhawmte hian zawhna an neih leh an sawi duh zawngte sawina hun an neih bakah AH&Vety a thawktuten Serchhip khawchhunga vawk engemawzat chu rulhut damdawi an pe bawk  ani.

.