Home Minister Pu R. Lalzirliana chuan Police tur lak mekah duhsak bik awm lovin dik tak leh fair takin a titha apiang lak an ni dawn, a ti a. He thu hi Lal Thanhawla Auditorium-a Govt. Johnson College Week Closing Function a hmanpuinaah a sawi a ni.

Home Minister chuan written exam pawh dik leh fair taka kalpui anih tur thu sawiin chhang dika inngai tling silote tan complain theih anih tur thu leh chhanna a enho theih tur thu a sawi a. Pu R. Lalzirliana chuan pawl 8 pass chin tan dil theih anih angin, pawl 8 pass chin tana chhan theih tur question set a ni anga, a titha apiang lak an ni ang, a ti bawk a ni.

 Home Minister chuan thiam bik tan chuan hna a awm reng thu sawiin zirlaite chu theihtawp chhuaha zir theih zawng zawng zira, thiamna sang tak nena ram rawngbawltu ni turin a chah a. College luh tan dawn atanga mahni subject lak tur thlan thiam a pawimawh thu sawiin tunlai khawvelin a mamawh leh eng hnaah nge hmasawnna awm tihte zirchianga uluk taka subject thlan thin tur a ni, a ti a. Pu R. Lalzirliana chuan zirlaite chu an vanglai hun an hman mek laiin mahni inthununna(self-discipline) neia ruihtheihthil taksa tichhe theitu laka fihlim turin a chah nghal a ni.

Home Minister hian Function hma hian Govt. Johnson College hi tlawhin an building thar sakna tura an harsatna tawhte a hmunah a enpuia, hemi atana hmalak dan tur sawiho nghal a ni.

Govt. Johnson College Week Closing Function hi Pu Zorammawia, Vice President GJCSU in a kaihruai a, GJCSU Assistant General Secretary hnen atangin report ngaihthlak niin Govt. Johnson College Principal Prof. K. Vanlalmawia’n thu a sawi bawk a. He huna Khuallian Home Minister Pu R. Lalzirliana chuan  College Week an hman chhunga inelna hrang hranga tithate hnenah lawmman a sem nghal a ni.

Govt. Johnson College hi kum 1993-a din niin tun dinhmunah zirlai 857 leh zirtirtu 25 an nei mek a ni.