3505/2024-2025

Aizawl, the 13th December, 2024: Mizoram Governor Dr. Hari Babu Kambhampati chuan vawiin chawhma khan Assam Rifles sipai zinga hna thawk tha zual thlanchhuah mi 35 te hnenah chawimawina tangkapui Governor's Gold Medal 15 leh Silver Medal 20 a hlan. Investiture Ceremony hi Inspector General Assam Rifles (East) buatsaihin Circular Lawn, Raj Bhavan-ah neih a ni.

He huna thu a sawinaah Governor Dr. Hari Babu Kambhampati chuan Assam Rifles buatsaiha sipai hna thawk thate chawimawina neih a ni leh he hun pawimawh tak hmanpui theia a awm chu lawmawm a tih thu sawiin, Assam Rifles-te chu India rama paramilitary force upa ber leh India hmarchhaka hmingtha tak, an hnathawh that avanga 'Tlang mite thian' tih hiala vuah an nih thu a sawi a. A bikin Mizorama ruihhlo tawlh man leh dan lova sumdawnna ven kawnga 23 Sector Assam Rifles-te hmalakna fakawm a tih thu a sawi a. Tunhnaiah ralthuam thahnem tak bakah helte thlenga man an ni leh khawtlang mipui rawngbawl sak kawnga Assam Rifles-te hmalakna chhuanawm a tih thu a sawi bawk.

Governor chuan chawimawina ngaihhlut hlawh tak dawngtu Assam Rifles sipaite, an chhungte leh thenrualte thinlung taka a lawmpui thu leh hetiang dawng thei tura an tawiawmna ropui a tih thu sawiin, Governor's Gold leh Silver Medal-te hi chawimawi phute chauh hlan thin an ni a, hetiang chawimawina hlan theia ka awm hi ka lawm takzet a ni, a ti a. Chawimawina dawngtute chu rinawm taka thawk chhunzawm zel tur leh an hlawhtlinna chu ram rawngbawl kawnga phurna petu atana hmang turin a fuih nghal bawk.

Assam Rifles Investiture Ceremony-ah hian Brigadier Girish Upadhya, SM, VSM, DIG, 23-Sector Assam Rifles bakah Assam Rifles Officer-te leh sawm bikte an tel a ni.