3434/2022-2023

Champhai, the 1st February, 2023: Governor Hari Babu Kambhampati chuan vawiin khan ni 2 chhung cham turin Champhai a thleng a. Chawhma dar 10 atangin DC Conference Hall-ah Head of Office-te, Bank hotute, political party hruaitute, kohhran hruaitute leh tlawmngai pawl hruaitute nen inkawmna hun an hmang nghal a ni a. Governor hi Law & Judicial Minister Pu T.J. Lalnuntluanga, Champhai South bialtu MLA ni bawk chuan a tawiawm a ni.

Governor Pu Hari Babu Kambhampati chuan mipui hmakhua ngaia Sawrkar kaltlanga scheme pawimawh tak takte tha taka kalpui a tul thu sawiin, power supply, inbiakpawhna, insak tanpuina, inkalpawhna, eirawngbawlna gas, in tina tui in tur pek leh adangte chhawpchhuah kawngah tanlak a tul thu a sawi a. Mipuite tana hamthatna leh scheme pawimawh tak takte hun bituk chhung ngeia zawhfel hman a pawimawh thu sawiin, hna tih khaihlak leh tih khawtlai hi mipuite dikna leh chanvo palzutna a ni, a ti. 

Line Department leh Bank hotute chu khua leh tuite tana duan scheme pawimawh tak takte mipuiten an hriata an chhawr tangkai ngei theihna tura zirtirna tam zawk kalpui thin turin a chah a. Scheme-te an hriat mai piah lamah ataka an chhawr tangkai ngei theihna tura hmalakpuia tih dan kawhhmuh an tul thu sawiin, bank hotute chu social security scheme Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY), Atal Pension Yojana (APY) te mipuiten an hmelhriata, an tangkai pui ngei theihna tura hrilhfiaha hmin tum turin a chah a ni. Heads of Offices leh Banker kalkhawmte chu Sawkar laipui leh State Sawrkar kaltlanga hmalaknate tha taka hlen chhuak thei tura taima leh rinawm taka thawk turin a chah a ni. 

Law & Judicial Minister Pu T.J. Lalnuntluanga chuan Champhai tlawha Sawrkar hmalakna hrang hrangte zirchiangtu Governor chungah lawmthu a sawi a. Mizoram University Eastern Campus Champhaia dah anih theih nana tanlak pui turin a ngen a. Land Custom Station (LCS) Zokhawthar chu Integrated Check Post (ICP) a hlankai thuaia, dan mumal tak hnuaia insumdawntawnna kalpui anih theih nana a tul anga hmalak pui turin a ngen bawk a. Champhai District chu khualzin mi tam zawk hip thei tura theihna nasa tak nei anih anih thu pawh sawiin, hetiang lam hawia central sawrkara a tul angte bawhzuia hmalak pui turin a ngen nghal bawk a ni. 

He hunah hian Champhai District Bawrhsap Pu James Lalrinchhana'n Champhai District mipuite aiawhin Governor Hari Babu Kambhampati lawmna thu a sawi a; Champhai District chanchin kimchang, Centrally Sponsored Scheme kalpui meka hmasawnnate, hmalakna kal mekte leh hmachhawpte powerpoint presentation hmangin a tarlang nghal bawk a. Hemi hnu hian Pu Lalrinpuia Varte, Superintendent of Police-in Champhai District venhimna kawnga police hnathawhte bakah dan leh thupek kenkawh kawnga Champhai District dinhmunte powerpoint presentation hmangin a sawifiah bawk a ni.

District Bawrhsap Pu James Lalrinchhana'n report a pek dan chuan square kilometre 3,185 a zau Champhai District-ah census tlai ber 2011 tarlan danin mipui 1,25,745 awmin, sex ratio 984, literary rate 95.91% a ni a, Electoral Roll thar berah Champhai District chhunga Assembly Constituency 3 ah voter 56,362 an awm a ni. Champhai District-ah Department hrang hrang Heads of Offices 67 an awm mek a. Nimin thlengin Champhai District-ah raltlan 9,751 an awm a, heng zinga 3,727 te hi naupang an ni. Refugee camp 34 awm mekin, mi 9,751 te profiling zawhfel niin Temporary ID mi 9,488 te pek an ni a, raltlan pualin legal awareness tum 12 neih a ni tawh bawk. 

Assembly Constituency 3 hnuaia SEDP beneficiary 4,500 te hnenah tanpuina sem chhuah tawh a ni a. Champhai District Water and Sanitation Mission (DWSM) chu 3 star category hnuaiah October 2022 atan India rama district 165 zinga ti tha ber a ni. PMAY-HFA (Urban) hamthatna dawngtu 4,103 zinga 679 zawh a ni a, Mizoram bika best performing district atan January ni 19 ,2023 ah thlan a ni. MNREGA hnuah Sawkar kum kal mekah inhlawhna ni 72 siam a ni tawh a. Vawk hrileng African Swine Fever vanga harsatna namenlo tawh anih hnuah tun dinhmunah case report a awm lo a. Bank-te kaltlangin Financial Literacy Campaign tum 118 neih tawh a ni, hemi kaltlang hian mi 4,175 te zirtirna pek an ni a, bank-a pawisa dahluh leh loan pekchhuah inthauhna CD ratio chu December 2022 tawp quarter khan 74.56% a ni. 

SP Champhai Pu Lalrinpuia Varte tarlan danin Champhai District-in Indo-Myanmar border kilometre 160 a thui a nei a. Border pillar 3, BP 26,27 leh 28 te awmin dan lova thil tute tana awlsam taka ramri kan theihna vulnerable crossing point 23 bawr vel a awm a. Champhai District-ah Police Station 3 leh Beat Post 1 a awm bakah 2nd Assam Rifles & 42nd Assam Rifles te khaw 7 ah an an awm bawk. Kum kalta 2022 chhungin Heroin kg 24.3, Methamphetamine kg 21.252, Crystal Methamphetamine kg 20, Pseudoephedrine kg 28.80, Acetone litre 6880 te man a ni a; hemi kaihhnawihah hian case 92 ziahluh niin mi 121 man an ni. ND&PS Act hnuaia case 11% chinfel tawh niin, chinfel atanga 87% te thiamloh chantir niin, 13% te thiam chantir an ni. Pawisa lem Rs 9,54,500 man a ni a, District Level Wildlife Crime Control Sub-Unit kaltlangin kum 2022 chhungin exotic species 742 man a ni bawk. Kum 2020-2022 chhungin foreign cigarettee case 1,560 leh kuhva rah metric ton 369.74 te man a ni. Champhai District chhunga khua 48 te Free Movement Regime (FMR) huam chhungah an awm a; hemi huama chengte tan hian Border Crossing Agreement, 2018 angin Border Pass pe chhuak tura ruahmanna neih a ni. 

Pi Esther Leihang SDC, Champhaiin lawmthu sawiin Governor leh Official-te inkawmna hun hi khar a ni a. Hemi hnu hian Governor chuan a hran te tein kohhran hruaitute, political party aiawhtute leh tlawmngai pawl hruaitute a kawm chhunzawm nghal a ni.