3433/2022-2023
Kolasib dated 1st February 2023: Vawiin khan Pu John LT Sanga, Deputy Commissioner, Kolasib district chuan Khamrang leh Vairengte inkar kawng thawmthat hna chak zawk a kalpui a nih theih nan kawng siam hna viltu NHIDCL leh hna thawktu M/S Ratna Infrastructure Private Ltd. leh Sadguru Pvt. Ltd. a hotute a pisaah a kawm.

Pu John LT Sanga, Deputy Commissioner chuan Kolasib chu Mizoram state luhka pui a nih angin Mizoram hmel lanna pawimawh tak a nih thu a sawi a. Kolasib district tan tlang a National Highway awm te chu zinmite zawh tam ber pawl a nih angin tha tak a thawmthat a pawimawh thu a sawi. Ratna leh Sadguru hotute chu fur a rawn thlen hmain kawngpui thawmthat hna thawk vat turin a hrilh a, an harsatna sawipuiin a tul anga puih a inpeih reng thu a sawi. Inremna an lo ziah tawh angin hunbi tuk chhung a an hna chu thawk zo ngei ngei turin Ratna leh Sadguru hotute chu a chah a, kawng chhia chuan mipui tan harsatna nasa tak a thlen avangin thahnemngai tak a hna thawk turin leh hna tikhawtlai zawng a chhuanlam engmah siam lo turin a hrilh bawk a ni.

Ratna leh Sadguru hotute sawi danin Rel kawng siam avanga bungraw rit tak tak phur motor lian tam vang te, tuihawk luan kawr mumal awm lo leh bawlhhlawh in a hnawh phui thin vang te leh kawng siam lai a lirthei tlan lui an tam thin avangin kawng chu a tlo tur angin a tlo loh phah thin thu tarlan a ni a. Sadguru chuan Khamrang leh Kawnpui inkar kawng chu ni 20, February hmain siam zawh hman an tum thu an sawi a, Ratna chuan Vairengte leh Bilkhawthlir inkar kawng chu ni 15, March hmain siam zawh an inbeisei thu an sawi bawk. Pu John LT Sanga chuan kawng siam hna chu uluk tak a vilpui turin NHIDCL hotute a chah a, an hna kalpui dan a that leh that loh chu a hmun ah a endik tur thu a sawi.