3432/2022-2023

Kolasib dated 1st February 2023: Vawiin chawhma khan DC pisaah Pu John LT Sanga, Deputy Commissioner, Kolasib district chuan Kolasib district-a a hmasa ber ni turin ‘Zingtian’ chanchinbu, Android Application chu hman theih turin a tlangzarh a. Pu Zomuanpuia Tlau, Editor, Zingtian chuan a chanchinbu chungchang sawi zauna hun neiin Pu Hmingthanzuala, DIPRO chuan a telpui bawk a ni.

Pu John LT Sanga, Deputy Commissioner chuan khawvel changkannaina a ken tel thiam thil hrang hrang hmang tangkai apiang dinchanna khawvel a nih tawh angin thuthar lak khawm leh thehdarh kawngah pawh heng thiamna hmang tangkai a, Kolasib district tana a hmasa ber ni tura ‘Zingtian’ Android application buatsaih a ni chu lawmawm a tih thu a sawi a. Hlawhtling tur chuan midang aia taimak, chik peih leh inzir peih mi nih a pawimawh thu sawiin Kolasib district chhunga chanchinbumite chu khawtlang tihhmasawnna atana hmanraw tangkai tak an nih thu a sawi.

Pu Hmingthanzuala, DIPRO chuan tunlai thiamna hman tangkaina chuan chanchinbu sem kawnga harsatna awm thin te chu a sutkian phah tur thu sawiin Mobile phone hmangin awlsam taka chanchinbu chhiar theih a ni tur chuan chhiartu mipui tam zawk a hip belh ngei a rin thu a sawi a. Electronic media inkaihhruaina leh Advertisement pekchhuah chungchangah pawh ruahmanna mumal tak duan thuai a tul tur thu a sawi.

Pu Zomuanpuia Tlau, Editor, Zingtian chanchinbu chuan Android Mobile phone a playstore atangin ‘Zingtian’ application chu download mai theih a nih thu leh kum 2023 chhung chu a duh apiang tan a tlawnin thutharlakkhawmte chu chhiar theih a nih tur thu a sawi a. Electronic media hmang tangkai tura a hmalakna a thahnemngaih tak a tanpuitute chungah lawmthu a sawi bawk a ni.