3431/2022-2023
Aizawl, 1st February, 2023 : Tukin atang khan Aizawl – Muallungthu inkarah city bus service tan tir a ni a, bus service hmasa ber hi Aizawl City Bus Owners’ Association (ACBOA) office kawt, Ngaizel atangin Health Minister Dr R. Lalthangliana chuan a vailiam. City bus service hian Zoram Medical College (ZMC) a paltlang dawn avangin damlote leh anmahni enkawltute bakah damlo kantute tan tangkai tura beisei a ni.

ACBOA office kawta bus service vailiam inkhawm buatsaihah Healh minister Dr R. Lalthangliana chuan hun engemawchen atang tawh a an lo beisei leh nghahhlelh Aizawl leh Muallungthu inkar city bus service tihhlawhtlin a ni ta chu lawmawm a tih thu sawiin Transport minister Pu TJ Lalnuntluanga’n thahnemngai taka a awlsam zawnga hma a lo laksak avangin lawmthu a sawi bawk a. Transport department hotute leh ACBOA ten Health department duhthusam tihlawhtling tura theihtawp an chhuahpuinaah lawmthu sawiin city bus in a paltlang tur veng leh khua a local council leh village council hotute chungah lawmthu a sawi bawk a ni.

Dr Thangtea chuan ZMC pan ngai damlo leh damlo awmpuitute bakah damlo kantute zinga a tam zawk tan taxi hman a hautak deuh thin avangin chuan man tlawm zawk city bus service awm thei se tiin duhthu an sam thin tih sawiin tunah a hlawhtlinna kan hmu ta a, mamawhtuten an chhawr tangkaia an phurrit a chhawk zangkhai ngei ka beisei a ni a ti a. Civil Hospital, Aizawlah khum dah belh a harsat tawh avangin ZMC lamah damlo in admit a ngai thin a, ZMC ah hian khum 500 a awm bakah cabin engemawzat siam mek a ni a, reiloteah zawhfel kan inbeisei a, city bus service hian heng chhawr tangkai kawngah hian kawngro a su ngei ang a ti a ni.

ACBOA President Pu PC Zoliansanga pawhin mipuite tana rawngbawlna huang zauh tura Ngaizel – Muallungthu city bus service tir a ni ta chu lawmawm a tih thu sawiin a mamawhtuten an chhawr tangkai ngei a beisei thu a sawi a, bus tlan hun an ruahman chu a tul anga ennawna tihdanglam leh theih a nih thu a sawi bawk a ni.

City bus hi nitin Ngaizel – Muallungthu inkarah vawi 8 a tlan tawn dawn a, bus hmasa ber hi zing dar 6:20 ah Ngaizel atang a chhuak ang a, a dang zawng hi Bawngkawn atang a chhuak thung ang. Bus tlan dan tur hunbi a hnuaiah hian tarlan a ni. 

Bus fare hetiang hian bituk a ni

Ngaizel – Saikhamakawn             Rs. 10/-

Ngaizel – Melthum                       Rs. 15/-

Ngaizel – Trinity Hospital             Rs. 20/-

Ngaizel – Hualngohmun              Rs. 30/-

Ngaizel – Melriat                         Rs. 35/-

Ngaizel – Kelsih                          Rs. 40/-

Ngaizel – Falkawn (ZMC)           Rs. 50/-

Ngaizel – Muallungthu                Rs. 50/-

Muallungthu – Falkawn (ZMC)      Rs. 10/-

Muallungthu – Kelsih                     Rs. 15/-

Muallungthu – Melriat                    Rs. 20/-

Muallungthu – Hualngohmun        Rs. 30/-

Muallungthu – Trinity Hospital       Rs. 35/-

Muallungthu – Melthum                 Rs. 40/-

Muallungthu – Saikhamakawn      Rs. 50/-

Muallungthu – Ngaizel                  Rs. 50/-

Ngaizel atanga Aizawl khawpui chhung lam zawng chu fare pangngai a ni ang

Bus service vailiamnaah hian Health department Principal Director, ZMC Director, Transport Director, ACBOA hruaitute, Bus paltlang tur khua/veng local council leh VC hotute te an tel a ni.