3430/2022-2023

Dated Serchhip, the 31st January, 2023: Nizan dar 8:00 PM khan Pu Robert Romawia Royte, Minister, Sports & Youth Services, Tourism, ICT, etc , chuan Mizoram Open Boxing Championship, 2023, Serchhip District Boxing Association ten an buatsaih chu a hawng.

A hawnna inkhawm Serchhip Boxing Hall a buatsaihah hian Minister chuan, Serchhip District Boxing Association ten Mizoram Open Boxing Championship changtlung tak an buatsaih thei leh ta chu ropui a tih thu a sawi a. Mizoram hmun hrang hrang atang Boxer 103 zet kal khawmte hneh taka lo thlenga, duat taka lo mikhualtu Serchhip mipuite hnenah lawmthu sawiin, Boxer kal khawmte duhsakna a hlan a ni. Minister hian 42nd AR ten an sponsore te chu thil thleng zen zen lo, lawmawm tak si a ni, a ti a. Assam Rifle te chu hetianga Sports Events dangte pawh sponsore zui zel thin turin a sawm a ni.

A hawnna inkhawm hi Pu Kapliana Pachuau, President, Serchhip District Boxing Association in a kaihruaia, Colonel Vikas Dubey, CO, 42nd Assam Rifle chuan kal khawm mipuite lawmna thusawiin, Serchhip District Boxing Association nena Mizoram Open Boxing Championship, 2023 an buatsaih thei chu lawmawm a tih thu a sawi a, Mizo thalaiten talent tha tak an nei tih kan hriaa, hmasawn zel turin kan duhsak a, he huna rawn tel Boxer zawng zawngte duhsakna sang ber ka hlan a ni, a ti. A hawnna inkhawmah hian zaithiamten hun an hmang bawk a ni.

Mizoram Open Boxing Championship, 2023, Serchhip hi 42nd Assam Rifle ten an sponsore a ni a, mipa weight hrang 10-ah Mizoram hmun hrang hrang amangin boxer 90 an tel a, hmeichhia weight pangaah boxer 13 an tel bawk a, an vaiin Boxer 103 an inlan dawn a ni. Zanin atang hian LPS Vision-ah live-a pek chhuah tan a ni ang.

Championship hian February ni 3 thleng a awh dawn a ni.