3429/2022-2023

Aizawl 31st January 2023: Vawiin khan Governor Shri Dr. Hari Babu Kambhampati chuan 'North Eastern Council Golden Jubilee Celebration Symposium in Mizoram' chu Aijal Club Conference Hall-ah a hawng.

Governor Shri Dr. Hari Babu Kambhampati chuan Mizoram chuan kum 35 Statehood a neih meuh chuan hmasawnna tam tak hmuhtur a awm a, Mizoram chu SDG India 3.0 in a tarlan danin, a ti tha 12th na niin, hmasawn chak ber state a puan a ni a ti a. North East Council hian hmasawnna Mizoramin a neih zawng zawngah mawhphurhna sang tak a nei a, Mizoram chuan NEC sum atanga hna tha taka a thawh thin thu a sawi a. NEC hian hmarchhak state hrang hrangah nasa takin hmasawnna hna an thawk a, Mizoram pawhin Agriculture, Higher Education, Power leh Sector hrang hranga hmalakna chhawr tangkai ber te zingah a tel a ni a ti a. Ramchhungah eizawnna tihhmasawnnan leh sumdawn kawnga hmasawnna tur ruahmanna tha tak - 'Mizoram Entrepreneurship & Start-up Policy, 2019' sawrkarin a nei a, hei hian eizawnna, sum leh pai thawhchhuah kawngah changkanna a thlen ngei a beisei thu leh Mizoram Startup Mission chu Planning & Programme Implementation Department chuan August ni 30, 2022 ah a kalpui thu a sawi bawk a ni.

Chief Secretary Dr Renu Sharma hnen atangin key note ngaihthlak a ni a. Mizoram chuan hmasawn zelin India ramin Kum 100 zalenna a thleng mai dawn a, kum 2047 atan Amrit Kaal chu sawrkar laipuiin a puan angin, Mizoram pawhin 2047 ah hmasawnna hrang hrang sum leh pai thawhchhuah kawngah emaw thiamna leh mihring khawsak phunga kan neih nan tun atanga kan inbuatsaih a ngai a ni, tiin a sawi.

He hunah hian Principal Adviser Dr. Lalrinchhana chuan kalkhawmte a lo lawm a. Sr.Research Officer Pi C.Lalnunsiami hnen atangin 'Achievements NEC & MDoNER in Mizoram' chu ngaihthlak a ni a. NEC hnathawh leh kalphung bakah NE State a hmasawnna hrang hrangte chu Planning Adviser, Pu C.H Kharshing hnen atanga ngaihthlak a ni bawk.

Symposium hawnna hun hi Technical Session in a zui a, research paper hrang hrang: Mizoram- A Developed State by 2047- Challenges, Way Forward; Health Sector in Mizoram- Challenges and Way Forward; Education on Mizoram- Challenges and Way Forward; Support Ecosystem for Doing Business in Mizoram te chu Resource person hnen atanga ngaihthlak a ni.

Tun dinhmunah hian NLCPR hnuaiah project 4 leh NESIDS hnuaiah project 17 kalpui mek a ni a. NEC funded projects 44 kalpui a ni mek bawk a ni.