Vawiin chawhma-ah khan Mizoram Governor Lt. Gen Nirbhay Sharma (Retd.) chuan venghimtu sipai te tana hel beih let dan leh ramhnuai a hmelma sipai nena indo dan zirtirna hmun, Counter- Insurgency and Jungle Warfare School(CIJWS), Vairengte a tlawh.

Briefing Room-ah Maj. Gen Vivek Sehgal, Commandant, CIWS chuan Governor Lt. Gen Nirbhay Sharma (Retd.) hi CIJWS chungchang leh hmalakna te a hrilhfiah hmasa a. He mi hnu hian Governor leh Army Officer te chuan CIJWS hmun pawimawh tak tak an tlawh kual a ni.

Maj. Gen Vivek Sehgal, Commandant, CIWS leh a thawhpui Army Officer te a kawmnaah Governor Lt. Gen Nirbhay Sharma (Retd.) chuan India ramchhung mai ni lo, khawvel hriat hlawh venghimtu sipai te tana intahhriamna hmun tha ber pawl Mizoram-ah a awm chu lawmawm a tih thu a sawi a. Terrorists, Naxals bakah hel pawl hrang hrang te beihlet zir a pawimawh tluk zet in hel pawl hrang hrang te rilru put hmang leh an pawl kaihruai dan te zir tel a pawimawh a ni a ti. CIJWS chuan India ram venhimna kawngah a thawh hlawk a. Khawvel ram hrang hrang a remna leh muanna atan thawk tu, venghimtu sipai te tan nasa takin a thawk a ni a ti a. An hmachhawpah hlawhtlinna an neih ngei a duhsak thu sawiin khawtual mi te leh Mizo mipui tan pawh tangkai zawk a luangchhuak thin turin CIJWS Officer te chu a chah a ni.

CIJWS-ah hian India ram venghimtu sipai chi hrang hrang te chu hel beih leh ramhnuaia hmelma sipai nena indo dan zirtirna pek a nih thin thu Army Officer te chuan an tarlang a. Khawvel ramdang 39 atanga venghimtu sipai lo kal te Officer te pawh in zirtirna dawngsawng tawh in CIJWS a training pumpui atanga 20% aia tlem mah chiah hi inchhunga zirtir a ni.