14th September :    Vawiin khan  NEC bultumin Universal Hindi Communication Centre, Aizawl chuan Vanapa Hall-ah Hindi Diamond Jubilee leh Grand Festival of Universal Communal Harmony lawmna hun a buatsaih a, Mizoram Governor Lt.Gen.M.M.Lakhera, PVSM, AVSM, VSM chu Khuallian a ni. Hindi hi 14 September, 1949 atang khan rampum tawngpui (national language) atan puan a ni tawh a, vawiin hi a kum 60 tlinna chiah a ni a, rampumah Hindi Diwas atan he ni hi hman thin a ni.

 

 

Governor chuan hnam tawng atana Hindi puan a nih chungchangah hian thil hriatsual palh a awm thei nia a ngaih thu sawiin Hindi uar avang hian tawng dang rahbeh tumna engmah a awm lova, amaherawhchu rampum huapa tawng tualleng pakhat neih chuthil tangkai zawk a nih avangin a hmangtu tam ber Hindi chu national language-ah puan a ni mai zawk, a ti a. Mizoramah pawh primary school atanga Hindi zirtir a ni ve ta chu a lawm thu Governor chuan a sawi. Tawng thiam tam hrim hrim hian khawi hmunah pawh min ti tlangnel a, nunphung tinrengah awlsamna thui tak min thlen thin a ni, a ti.

Vawiina Hindi Diamond Jubilee lawmnaah hian Khual zahawm chan changin Law Secretary leh Hindustan Club President Pu P.Chakraborty; UHCC Senior Adviser Pu P.K.Handique; Padmashree Prof. Laltluangliana Khiangte; RIPANS Director Dr.Lalthanpuii Hnamte leh Assamese lehkhabu ziaktu lar tak Pi Rupa Gogoi ten he hun hi an hmanpui a ni.