Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan kumin HSLC leh HSSLC 2017-a Top Ten zirlaite chu an sikul Principal leh an nu leh pate nen Raj Bhawan-ah sawmin heng zirlai tithazual 62-te chu lawmpuina Certificate leh sumfai a hlan.

Mizoram Governor chuan Raj Bhawan Durbar Hall a Inkhawm neihah  HSLC & HSSLC 2017 Top Ten te chu an hlawhtlinnaah a lawmpui takzet a ni tih sawiin an zirlaipui dangte tan entawn tlak ni zel turin a fuih a. Zirna kawngah heng Board Exam pahnihte chu pawimawh tak leh mipuite pawhin an ngaihven ber a ni a, zirlaite tan an nakin zel hun atana an inbuatsaihna rahbi pawimawh tak a ni bawk, a ti a. Tuna an hlawhtlinna chu duh tawk mai lovin tumruhna leh hmathlir neih rana lehkha zir zel turin a chah a, an zirtirtute thawhrimna leh an hlawhtlin theih nana an nu leh pate inpekna theihnghilh lo turin a hrilh bawk. Mizo thalaite chu theihna leh thiamna tam tak nei mahse nunphung leh thil chin thalo, heng vaihlo, zu leh drugs te hi hawisan ngam turin zirlai leh thalai zawng zawngte a chah a. Mizo naupangte chu hmundanga naupangte aiin an nep bik lova a hmuh thu sawiin Larsap chuan Mizo tawng bakah tawng dang Hindi leh English thiam a tulzia te, Science, Maths leh Technology lamah tui zual tura a duh thu te leh nakin hunah an eizawnna lam an thlan hunah an tuina zawng tak thlang thiam turin a chah.

Vawiina HSLC & HSSLC 2017 Top Ten zirlai chawimawina hunah hian Mizoram Governor-in lawmpuina a hlan dan chu a hnuaia mi ang hi a ni :

1. 1st Rank = Rs.7000/- + Citation

2. 2nd rank = Rs.5000/- + Citation

3. 3rd Rank = Rs. 3000/- + Citation

4. 4th - 10th Ranks = Rs.2000/- + Citation.

Attachment

  • Loading attachment...