YMA Sub-headquarter, Kolasib kumpuan bawhzuia Police Department, Excise & Narcotics Department leh YMA te tangkawpin ruihhlo an man khawm Rs.17,14,595/- man hu chu vawiin khan Pu R.Lalzirliana, Home Minister in Khuangpuilam, Kolasib-ah a tihral a ni.

Ruihhlo tihralna hun hmanah hian Pu R.Lalzirliana chuan ruihhlo tihrem kawngah Police leh Excise & Narcotics department te hnathawh lo thlir liam  mailova, YMA ten thahnemngai taka hnathawktute an pui thin chu chhuanawm a tih thu a sawi a. Hetih rual hian danlova ruihhlo zawrh man tur tam tak a awm chu pawi a tih thu sawiin, mizo thalai te leh nu leh pate kan tan a ngai a ni a ti a. Ruihhlo laka fihlim turin theihtawpa inzirtira hma kan lak zel a tul a ni tiin, insumthei mi ni turin tanlak a ngai a ni a ti. Thawhhona tha tak nena ram hmasawn nan leh ram leh hnam humhalh nana hmalakpui zel turin YMA, khawtlang hruaitute leh kohhran hruaitute Home Minister hian a sawm a  nghal bawk.

Ruihhlo man vawiin a tihral te hi Heroin 579 plastic burte, Parvon spas 3,615 capsules, Pseudoephedrin 3,11,135 tablets, ganja 35 kg, nitrozepam 52 strips leh zu te an ni.