Mizo Zirlai Pawl, Kolasib buatsaihin vawiin khan kumina HSLC leh HSSLC exam a tithate chawimawina hun Parish Hall, Venglai Kolasib-ah hman a ni a, Pu R.Lalzirliana, Home Minister chuan he hun hi a hmanpui.

Pu R.Lalzirliana chuan zirlai tithate chawimawina chang zirlai pawl ten an hria chu lawmawm a tih thu a sawi a, chawimawi tlak a titha zirlai an awm chu lawmawm a tih thu a sawi a. Zirlai titha chawimawi te chu hlawhtlinna duhawm tak an seng zel theih nan thawhrimna leh taimakna nen hmalam pan sauh sauh turin a fuih a. An hlawhtlin leh tlin loh chu anmahni invawn dan leh zir danin a hril dawn a ni tiin, mahni tana chakai khawrh theuh kan ni tih inhre thar zel turin a chah a. Nu leh pa te thuawih hi malsawmna leh vanneihna a ni tih hria a, an thuawih a, hmangaih nachang hre thar zel turin zirlai naupang te a chah bawk a. Exam la hmachhawn tur zirlai kalkhawmte pawh  Mizorama langphak tura tang turin a fuih bawk a. Zirlai te kan thiltih apiang tihtakzeta kan tih chuan a ber kan ni thei tih hria a, Mizoram mai nilo India rampuma lang thei turin tanla turin a chah a ni. Thalai te chawikan nan sorkarin hma a la mek zel a ni a ti bawk.

Vawiina zirlai titha chawimawi te hi HSLC leh HSSLC a Distinction leh First division a pass 96 an ni a, chawimawina thuziak leh thilpek hlan an ni a. Zirlai titha chawimawina hunah hian Kolasib khaw tihmingthatute chawimawina neih nghal a ni a, heng mi: Brenda Zothanmawii, National Mathematics Indian Talent a Top Ten a lang; Dr.R.Lalthlamuana, Dr. Lalthazuala Rokhum leh William Lalnunfela, Aizawl FC player te hnenah pek a ni.

Education Awareness hun hman nghal a ni a, Pu C.Vanlalmawia, DIET Principal in zirtirna a pe a ni. Zirlai te tana hriat tur pawimawh zirna bakah tangkai tur te zirtirna pek an ni.

Chawimawina hun hman zawh hian Home Minister hi MZP te hian Circuit House, Kolasib-ah kawmin, Kolasib atang Doctor sawnchhuah chungchang te, ITI sakna hmun tur chungchang leh Higher secondary school chungchang te an sawipui a ni.