State Agricultural Management & Extension Training Institute (SAMETI)-in Lawngtlai District-a ran vulhtute tana ran vulh leh a kaihhnawih thil pawimawh tak tak zirna an buatsaih chu vawiin khan Lawngtlai DC Conference Hall-ah Lawngtlai Bawrhsap Dr A. Muthamma IAS, Lawngtlai District tana ATMA Governing Board Chairman ni bawk chuan a hawng.

Bawrhsap Dr A. Muthamma chuan SAMETI-in Lawngtlaia a tum khat nana off-campus training an rawn buatsaih chu lawmawm a tih thu leh ran vulhtu kal khawmte paw’n an sawtpui ngei a beisei thu a sawi a. Sum leh tha tam tak senga training buatsaih, a rah chhuah hmuh tur awm si lo a awm thin a, training awmze nei leh chhawr zui ngei theih buatsaih thin a pawimawh a ni tiin, training kalpui dan chu fel fai taka chhinchhiah a, a buatsaihtute paw’n a hlawhtlin nana an bawhzui leh thin a pawimawh a ni, a ti a. Sum leh paia intodelh nan leh mipuite hrisel nan taksa mamawh chaw tha min petu ran vulh uar a, thar chhuah tihpun leh a hriselna ngaih pawimawh a tul a ni, a ti bawk.

He training hawnna hi SAMETI Director Pu RK Nithanga’n a kaihruai a. SAMETI leh ATMA kalphung leh hma lakna te a sawi zau hnuin kal khawmte inhmel hriattirna hun hman zui a ni a. Lawngtlai District AH & Vety Officer Dr B.Zonghinga pawhin thu sawiin, SAMETI-a faculty Dr PL Lalruatfela’n lawm thu sawiin hun a khar a ni.

SAMETI hi agriculture leh a kaihhnawih sector danga hlawk zawka hma lak theih dan zirna atan Mizoram Sawrkar Agriculture Department hnuaiah kum 2005 khan din a ni a. He ni hnih awh tur off-campus training on “livestock production, management and diseases prevention”-ah hian Lawngtlai District chhunga ran vulhtu 30 chuang an inziak lut a ni.

Attachment

• Loading attachment...