2869/2024-2025

Aizawl, the 6th November, 2024: Mizoram Governor Dr. Hari Babu Kambhampati, Visitor of ICFAI University ni bawk chuan ICFAI University Convocation tum 12-na, NJ Yasaswy Memorial Auditorium, ICFAI Campus, Durtlang North, Aizawla neih chu vawiin khan a hmanpui. He hunah hian Mizoram Chief Minister Pu Lalduhoma chu khuallian niin, Padma Shri Dr. Ravi Kannan, Director, Cachar Cancer Hospital & Research Centre chu khualzahawm a ni. 

Governor Dr. Hari Babu Kambhampati chuan tun hun thleng tura zirlaite inpekna leh harsatna paltlangte fakawm a tih thu sawiin, an hlawhtlinnaah thinlung taka a lawmpui thu a sawi a. Zirna chu hmasawnna rahbi hrang hrangte inghhahna lungthu pawimawh tak a nih thu sawiin, "Ngaihtuahna fim leh dik min put tir a, mawihnai taka chetlak leh khawtlang tana awmze nei zawka hmalak kawngah min pui thin a ni", a ti a. Degree dawng tharte chu finna leh thiamna nena thuam, khawvel thil thleng hrang hrangte tha taka hmachhawn thei tura ngaih an nih thu leh chona awmte pawh tha taka hlenchhuak zel thei tura beisei an nih thu sawiin, mahni in lum chhuahsan hreh lova hmun danga hna zawn tum turin a fuih bawk. 

Governor chuan zirlaite chu rinawmna leh taimakna nunpuia midang tana malsawmna nih tum tur leh an kalna apiangah a tha zawnga danglamna thlen tum turin a fuih a. Prime Minister-in kum 2047 ah India ram hmasawn 'Viskshit Bharat' din a tum chu 'Vikshit Mizoram' tel lova puitlin theih a nih loh thu a sawi a. Zirlaite chu Vikshit Bharat dinhmun ni thei tura Sawrkar laipui scheme hrang hrangte ngaihven tur leh Social Security Scheme pawimawh tak tak, kum tin Rs 432 leh Rs 20 chauh thawha insurance cheng nuai 2 thleng dawn theihna Pradhan Mantri Jeevan Jyoti Bima Yojana leh Pradhan Mantri Suraksha Bima Yojana-te, subsidy-a inchung solar system bunna scheme PM Surya Ghar Yojana leh adangte ngaihvena midangte zirtir chhawng turin a chah bawk.

Khuallian Chief Minister Pu Lalduhoma chuan degree dawng tharte a lawmpui thu sawiin, convocation chu an thawhrimna rah chhuah a taka hmuhna hun a nih mai bakah bultanna thar a nih thu sawiin, khawvel thang zelin a kentel chona hrang hrangte chu remchangah laa thil thar leh tha zawk ngaihtuah chhuah nana hman tum turin a chah a. Zirlai graduate tharte chu ram leh hnam innghahna la ni mai tur an nih avangin chona thar hmachhawn ngam tur leh eizawnna mai bakah thil dangahte pawh danglamna thlentu nih tum turin a fuih a. Mizoram zirna sang zawka seat awm indaihlohna phuhru tura ICFAI University hmalakna lawmawm a tih thu sawiin, zau leh lian zawka hma la zel nei turin a chah a ni.

Khualzahawm Dr. Ravi Kannan, Director, Cachar Cancer Hospital & Research Centre pawhin zirlaite chu an kalzelna turah duhsakna hlanin, midang tana rawngbawlna ngaipawimawh tur leh danglamna thlentu nih tum turin a fuih a. Nunkawng hrisel zawh tum turin a chah bawk. 

Vawiin Convocation-ah hian zirlai 207 te hnenah degree hlan a ni a, heng zinga 192 te hi Post Graduate niin, Under Graduate 15 an awm a. Medalist 27; Gold Medalist 13 leh Silver Medalist 14 te hnenah Governor leh Chief Minister te'n medal an hlan a. North East Indiaa cheng cancer natna veite enkawl kawnga a thawhhlawk em avangin Dr. Ravi Kannan, Director, Cachar Cancer Hospital & Research Centre hnenah Governor-in Degree of Doctor of Science (D.Sc. Honoris Causa) a hlan bawk.

He hunah hian ICFAI University, Mizoram Vice-Chancellor Prof. Bijay Singh kalkhawmte lawmna thu sawiin, Chancellor, Prof. Y.R. Haragopal Reddy hnen atangin thuchah tawi ngaihthlak a ni a. Registrar Dr. David Lawmzuala'n lawmthu sawiin hun hman a khar a ni.

ICFAI University Convocation vawi 12-naah hian Pi Sobharani Yasaswy, Chairperson, ICFAI Group,   ICFAI Group hotu dangte, Faculty leh Staff-te bakah zirlai nu leh pate an tel a ni.

ICFAI University hi ICFAI Group hnuaiah kum 2006 khan din niin, tun dinhmunah zirlai 548, Faculty 69 (32 regular & 37 visitor) leh Administrative Staff 15 an awm mek a. PG ah Course 11 leh UG ah course 8, avaiin course 19 ah zirna an kalpui mek a ni.