2870/2024-2025

Siaha the 6th November 2024: Vawiin khan MADC Golden Jubilee Hall, Council Vaih, Siaha-ah District Child Protection Union (DCPU) buatsaihin Adoption Awareness Month hawnna neih a ni a, MADC a SWD changtu Executive Member Pu T Seido chuan Khuallian niin a hmanpui. Kumin Awareness Month thupui atan ‘Rehabilitation of older children through Foster care and Foster Adoption’ tih chu hman a ni.

SWD changtu Executive Member chuan Adoption Awareness Month hawnnaa Khuallian tura sawm a ni chu lawmawm a tih thu a sawi a, vawiin programme chuan kalkhawmte leh mipuite rilruah dan ang taka fa lak chungchangah rah tha tak a chhuah ngei a beisei thu a sawi. Nu leh pa leh enkawltu mumal neilo, fahrahte nun riangvai zia sawiin ‘Fahrah puan hlai’ tih tawngkam awm chuan an dinhmun a pholang chiang hle a ti a, dan ang taka fa lak chu naupangte tan khawvel nuam tak siamsakna rahbi pawimawh tak a ni, a ti bawk.

Sawrkar Laipuiin Naupangte humhalh nan dan pawimawh tak tak, POCSO Act te, Juvenile Justice Act te a duang chhuak tiin an duan anga tangkai taka hman a nih theih nan mipui nawlpuiin awareness kan neih a ngai a ti a, heng dan tha tak tak te hmang tangkaitu ni theuh turin a chah a ni. Adoption Centre leh naupang humhalhna kawnga thawktute pawh fuihin hmangaihna rilru nen tih tak zeta an hna thawk theuh turin a fuih bawk.

Pu Teddie T Lalnunrema, Protection Officer , DCPU Siaha chuan vawiin hun hi kaihruaiin Non Institutionalised care chungchang presentation a pe bawk a, Pi Laltlanmawii, DCPO chuan keynote address pein Pi TT Sabina, Coordinator, Siaha Child Adoption Centre (SCAC) chuan Siaha a SCAC din dan leh an kalphung tlangpui tarlanna a nei bawk. Pi B Zisia, District Mission Coordinator, WCD bakah Prog Chawngkhuma Chawngthu, Chairperson-CWC ten thu sawi bawkin Pi malsawmtluangi Pachuau, Protection Officer (IC) chuan vote of thanks sawiin hun tih tawp a ni.