Mizoram University leh CENERS-K (research centre for eastern & north eastern regional studies) tangkawpa buatsaih international seminar on ‘Mizoram, Gateway to SE Asia? What needs to be done?’ chu nimin khan MZU Auditorium-ah neih tan a ni a. Ni hnih awh seminar chu vawiin tlai khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chuan Valedictory Address sawiin a kharna hun a hmanpui.

Mizoram Governor chuan seminar chhenfakawm tak Mizoram-ah nghah a nih chu a vanneihthlak hle a, a buatsaihtu MZU leh CENERS-K te chungah lawmthu a sawi a; he seminar chhimtute an phurin ngaihtuahna an hmang nasat bakah sawihona tha tak an nei tih a hriat chuan a ti lawm hle a ni, a ti. India ramin ‘Look/Act East Policy’ a ruahmanna zelah leh Mizoram chu South East Asia leh a piahlam pawhna ber tur khawngkharpuiah siam tumnaah Mizoram mipuite chu a nghawng tur ber an ni dawn tih i hre reng u tiin Pu Nirbhay Sharma chuan Mizoram chu tlantlangna kawn (transit point)-ah siam ringawt lovin a state leh a mipuite hmasawnna leh dinhmun tha zawk an channa turin kan thawhho a tul a ni, a ti. ‘Gateway to South East Asia’ a nih theihna tura Mizoram chu a awm ber tih sawiin state ralmuang ber a nihna te; boruak, sik leh sa duhthusama nuam leh thianghlim a neih te; ziak leh chhiar tamna leh zirna ngaih pawimawhna state a nih thu te a tarlang a; chumi rual chuan Mizote chu nunphunga an neih, heng vaihlo, zuk leh hmuam kalsan an mamawh thu leh tawng dang thiam leh skill development lam an hawi lehzual an mamawh thu a sawi bawk. Hnam dang nena inpawh vak lova rei tak a binga awm ho tawh Mizote chuan an rilru puthmang thlak tan a, khawvel ram leh hnam dangte ruala ke pen theihna turin an inchher chho a tul takzet a ni, a ti bawk.

Mizoram Governor chuan thu a sawi zelnaah Mizoram leh a mipuite lakah beiseina sang tak a nei thu, thiamna leh hnathawh lamah pawh inzir mi leh taima tak an ni tih sawiin, Mizoram chu state dang te ang chiah (copy) ni lovin anmahni duhdan leh an dinhmun te milin ‘Gateway’-a siam a fuh zawka a rin thu a sawi a. Ram pahnih - Myanmar leh Bangladesh - nena ramri intawm a nih avangin Mizoram border area leh khuate hmasawnna leh tihchangtlunna tur kan ngaihtuah tel a ngai a, anmahni khumin hmasawnna kalpui tum chuan a khingbai dawn a ni, a ti bawk. Mizoram chu thing leh mau-ah a hausakna leh boruak thianghlim tak a neih bakah ramhmul damdawiah a hausakna chu hmang tangkaiin khawvel pum hriat khawpin hming a chher thei a ni tiin Seminar kharna hun hi Mizoram hmasawnna tur sawihona hun tawpna ni lovin, hmalak tanna chauh zawk a ni, a ti.

Seminar kharna inkhawma lawmthu sawitu Dr.K.Vidya Sagar, HoD, Political Scuience, MZU chuan Mizoram hmasawnna tithuanawptu ber chu ‘connectivity’ tha tawk loh hi a ni a, hemiah hian tanlak a ngaih thu a tarlang bawk. Seminar kharna hunah hian Dungtlang khuaa ‘Pipu Sulhnu Humhalhtu Pawl’ hnenah ‘Young Achiever’s Award hlan nghal a ni.