Mizoram sorkara Disaster Management & Rehabilitation Department leh GeoHazards International/India tangkawpa buatsaih ‘Practical Applications of Neotectonics & Quarternary Geology in Geological Hazards Assessment Training’ chu vawiin khan I&PR Conference Hall-ah Mizoram Governor Lt Gen Norbhay Sharma, PVSM, UYSM, AVSM, VSM (Rtd)-in a hawng.

Training hawnna inkhawm DM&R Secretary Pu Zothankhuma kaihhruaiah Khuallian Mizoram Larsap chuan khawvela lirnghing thlen theihna hmun hlauhawm zual 5 an chhiar zingah India hmarchhak bial hi a tel ve a; lirnghing nasa tak a thlen hnuhnun ber chu kum 1954 khan Assam ramah a thleng a, chumi hnuah a aia na lo zawk mahse a hma aia zing zawkin NE state hrang hrangah a thleng mek a ni, a ti a. Mizoram a rawn thlen tirha a leilung awm dan a hmuh khan lirnghing leh khuarel chhiatna dangte thlen theihna hmun a ni tih a hmuh thu sawiin sorkar lam pawhin invenhimna tur Dan (regulations) te siam thin mahse mipui lamin an zawm tha tawk lo niin a lang, a ti. Lirnghing, leimin leh chhiatrupna hrang hrang thleng thei dinhmunah ding tih inhre reng chungin mipuiten invenhimna leh chhiatrupna thlen pawha a nghawng chhiat tur tih nepna tura hmalak ngaihthah a hun tawh lo hle a ni, a ti bawk. Training chhunga mithiamte nena zirhona an neih chu a taka hman theih tur ruahmanna duang chhuak turin Pu Nirbhay Sharma chuan a chah a, Mizoram leilung zirchianna an neih turah pawh khuarel chhiatna laka inven dan tur chauh ni lovin a tha zawnga Mizoram leilung hausaknate hman theih dan sawiho turin a hrilh bawk.

GeoHazards International Landslide Specialist Pu Kevin Clahan chuan hmarchhak bialah a bik takin lirnghing leh leimin/lei tlahniam a tam thu a sawi a. Leimin tamna chhan zingah thing leh mau tih chereu a nih nasat bakah boruak sik leh sa inthlak danglam mek nghawng a ni bawk, a ti. Training ni 10 chhung hian leimin leh khuarel chhiatna dangte a thlen pawha nunna leh bungrua ten an tawrh nep theih zawkna tur an sawiho dawn tih a tarlang a. Aizawl District chhung atan leimin/lei tlahniam leh lirnghing laka invenna tur rawtna hrang hrang an siamte chu sorkar hnenah thehluh a ni zel ang tih a sawi bawk.

Geological Hazards Assessment Training-ah hian Leonardo Seeber, Research Professor, Lamont Doherty Earth Observatory, Columbia University; Kevin Clahan, Principal Engineering Geologist, Lettis Consultants International, Inc; Paul Betka, Postdoctoral Researcher, Lamont Doherty Earth Observatory, Columbia University; Ryan Sincavage, Vanderbilt University; Hari Kumar, GeoHazards Society leh H. Lalbiakkima, Joint Director of Department of Geology and Mineral Resources ten an zirtir ang a; Aizawl leh a chhehvel hmun hrang hrangah te kalin zirchianna an nei ho dawn a ni.