Vawiin hian Information & Public Relations Minister Pu Lalthanzara chuan Sialhau Branch YMA Platinum Jubilee, Sialhau Community Hall a hman mekah khuallian niin a tel pui a. Jubilee pual lungphun a hawng bawk.

Thu sawiin Pu Lal Thanzara chuan,YMA chu chanchintha hrin chhuah pawl thianghlim, a tir atanga vawiin thlenga mi rethei leh chanhaite thian, khawtlang leh vantlang nun siam thatna kawnga pawl tangkai ber, sawrkar kutke pawimawh tak a ni a. Kan ramin YMA a nei hi Pathian malsawmna ropui tak a ni, a ti. Ram pum huapa YMA hmalakna pawimawh tak tak sawiin tunah hian YMA chuqn ruihhlo do beihpui a thlak meka, kan thalai ruihhlo bawiha tang mekte sim tira an thlarau pawhin chhandamna a chan zel theih nan Pathian rawngbawltute phungbawmah sawmin hma a la hial a ni, a ti. Chutih laiin kan ramah zu lova nung thei lo tam tak kan awm tih sawrkarin a hriat avangin chung miten zu tha deuh zawk in tur an hmuh theih nan sawrkarin ruahmanna a siam a ni, a ti bawk.

Sialhau mipuite chu an khawtlang leh YMA hruaitu lo ni tawhte zaha chawimawi tura ngenin hma lam thui tak thlir chunga khawtlang kaihruai chhunzawm zel turin a fuih a. Zuk leh hmuam kan uar avang leh mipat hmeichhiatna vanga natna tihbaiawm tak tak kan rama a punlun zel avangin chung thil tha lo laka fihlim tum tlat turin khaw mipuite chu a chah bawk.

Vawiinah nun kawng thianghlim leh dika kan nun theih loh chuan nakin lawkah ram hruaitu tha, khawtlang hruaitu fing leh kohhran enkawltu kan ramin a hmu zolo mai ang tih a hlauhthawn thu a sawi bawk.

Minister chuan Sialhau khaw panna kawng chu siamthat thuai a nih theih nan a rang thei ang bera DPR thehluh a nih tur thu a sawi langa Chhiahtlang -Lungpho kawngpui pawh zangnadawmna mipuiten an phut loh theih dawn chuan Consultancy Firm te nena tangkawpin hmalak thuai a ni ang, a ti bawk.

Minister hian Dekchi lian pakhat, No 50 leh Thleng 50 Sialhau Branch YMA hnenah hian a pe a. YMA, MUP leh MHIP te hnenah Silpauline pakhat theuh a pe a ni.

Pu Lal Thanzara hian Jubilee lawmna inkhawm neih hma hian Platinum Jubilee lungphun hawnna a nei bawk a ni.

Jubilee lawmna inkhawmah hian Khualzahawm Er. Lalrinawma bialtu MLA ni bawk pawhin thusawiin Sialhau khawtlang chu khaw inlungrual, entawn tlak leh khawtlang taima tak a nih thu sawiin a hminga bialtu a nih laia Jubilee an thleng chu lawmawm a tih thu a sawi a ni. Khualzahawm hian Jubilee puala Souvenir an buatsaih chu a tlangzarh nghal a ni.

Sialhau YMA Platinum Jubilee hi nimin atanga hman tan niin zanin thleng hian a lawmna programme neih a ni dawn a. Vawiin hi a lawmna pui ber ni niin Branch YMA Vice President Pu K. Vanlalthara'n a kaihruai a, Secretary Pu. R. Lalbiaknia'n report a pe thung. Tunah hian Sialhau Branch YMA ah hian member 285 an awm mek a, an zinga mi 128 hi hmeichhia an ni. Vawiin inkhawmah hian Central YMA aiawhte leh Sub Headquarters YMA aiawh ten thusawina an hman bakah zaithiam leh zaipawl ten mipuite an awi a. Khawtlang mi hmingtha te chawimawina hun te an hmang bawk. Tlai lamah khawtlang huam ruai an theh nghal a ni.

Sialhau khua hi Serchhip District a awm niin kum 1929 khan tuna an khaw awmnaah hian an hmunhlui atangin an insawn lut a. Tunah hian In 106 vel awmin mihring 550 vel an cheng mek a ni.