Vawiin khan Mizoram Governor Pu Kummanam Rajasekharan chuan Mizoram University, Tanhrilah Mizoram University Incubation Centre a hawng a. MZU-a Administrative Conference Hall-ah a hawnna programme buatsaih a ni.

Mizoram Governor chuan Mizoram University chu Mizoram chhuanvawr a ni tiin, India chhuanvawr pawh a la nih thuai tur thu a sawi a. Incubation Centre an hawng tak chu Mizoram bakah thenawm ramte tana thil tangkai a la nih tur thu a sawi a ni. India hmalam hun chu mahni kutkawiha eizawngte (entrepreneurs) kuta thui tak a innghah thu sawiin, vawiina an inpuahchah dan hian kan ram hmalam hun tur thui tak a hril a ni, a ti. Pu Kummanam Rajasekharan chuan tunlai khawvel inelna sang tak karah thalaite tan hun tha khawhral tur emaw awm hahdamna hun a awm lo a ti a. Education lamah tun aia nasa zawka hma kan sawn a ngai tiin, mahni kutkawiha ding chhuak tur chuan ngaihtuahna danglam neih a ngai a ni, a ti. Mizoram University Incubation Centre chu Start-up te chawrchhuahna, kan ram ei bar dinhmun chawikangtu a nih a beisei thu a sawi bawk a ni.

Mizoram University Vice Chancellor Prof. KRS Sambasiva Rao pawhin thu sawiin, University tana ni chhinchhiah tlak a nih thu a sawi a. Incubation Centre chuan mi fing leh ngaihtuahna danglam nei te tan remchanna a siamsak ngei ang, a ti a. Mahni zirlai piah lama hetiang thila ngaihtuahna seng peih te tan Incubation Centre chu a inhawng reng thu sawiin, ram hmasawnna atan pawh a tangkai dawn a ni, a ti. Incubation Centre chu hawn a lo nih tak avangin CEO, Coordinator leh thawktute chungah lawmthu a sawi a ni.

Coordinator Dr. Laldinliana chuan Incubation Centre din a nih atanga vawiin thlenga an hlawhtlinnate, an hnathawh dan te, service an pek theih te leh an thawhpuite chungchang a sawi a. Mizoram University Incubation Centre kaihhruaina hnuaiah Start-up pathum din a nih tawh thu leh a dang te pawh din belh zel an nih tur thu a sawi a ni.

Mizoram University Incubation Centre hi Directorate of Science and Technology, Government of India atanga sum hmuh cheng vbch. 10.45 senga din a ni a. 20000 sq. ft. a zau niin, 3D Room leh fabrication/ prototype lab te a awm nghal a ni.