Sorkar Laipuia Defence Accounts Department (DAD) leh Indian Army tangkawp buatsaih ni 2 awh tur ‘144th Defence Pension Adalat-cum-Ex Servicemen Rally’ chu vawiin khan Helipad Station HQ, Thuampui Aizawl-ah neih a ni a; he hunah hian Mizoram Governor Lt Gen Nirbhay Sharma, PVSM, UYSM, AVSM, VSM, (Rtd) chu Khuallian a ni. Defence Pension Adalat hmang tur hian New Delhi atangin Controller of Defence Accounts Pu N.Neihsial, IDAS; Maj Gen Sukesh Rakshit, GOC 101 Area HQ; Maj Gen SS Mishra, VSM, GOC 57 Mtn Div; Allahabad atangin Principal Controller (Pensions) Pu Praveen Kumar te bakah Defence Ministry leh Mizoram sorkar atangin officials pawimawh engemawzat an tel.

Mizoram hmun hrang hrang atanga Ex-Servicemen leh an chhungte kalkhawm hmaah Mizoram Governor chuan thusawiin Mizoramah a hmasa ber atan Defence Pensioner Adalat huaihawt theih a nih chu lawmawm a tih thu a sawi a; hemi tihhlawhtlin nana Defence Accounts Department hotuten theihtawp an chhuah avangin lawmthu a hrilh bawk. Defence Accounts Department chuan ex-servicemen leh an chhungte pension an lakna dan tur tih awlsam nan CGDA hnuai atangin direct-a an account-ah thawn a nih theih nan hma an lak mek chu a lawmawm takzet a ni, a ti. Ex-servicemen te chu ramchhung hmun hrang hrangah awm tawh thin leh hnam hrang hrangte nena chengho an nih avangin ram inpumkhatna leh hnam inunauna kawngah pawh an thawh hlawk hle a a hriat thu a sawi a. Mizoram ang state kilkhawr tak, a mipuite pawh a chibinga awm leh mahni tawng chiah hmang zinga ex-servicemen te ang tawnhriat ngah leh ram hmu zau zawkte chuan Mizoten tawng dang an thiam belh nan leh Mizo thalaten sipai lamah an luh tam theih nan theihtawp chhuah turin a chah. Mizo zinga sipaia tang hmasa 3 te chu Chief Minister nihna hial an thlen bakah Minister, MLA leh sorkar leh khawtlangah mi tangkai leh thawh hlawk an nih thu a tarlang a. Adalat ni 2 chhung chhim tura lo kal ex-servicemen leh an chhungte chuan an harsatna neih ang angte Defence Accounts hotute hnenah thlen vek turin a hrilh a. Mizorama Sainik School hawn tan turah ramchhunga a hmasa ber atan mipa leh hmeichhia tan admission tih theih nan hma a lak thu a sawi bawk. Mizoram Governor Pu Nirbhay Sharma hian vawiin Pensioner Adalat hawnna inkhawmah hian sipai nunna chanta nupuite leh Gallantry Award lo dawng tawhte hnenah chawimawina a hlan nghal a ni.

Defence Accounts-a hotulu ber Controller of Defence Accounts Pu N.Neihsial, IDAS chuan Pensioner Adalat an neih tawh zawng zawngah vawiin anga ex-servicemen leh an chhungte kal tha a la hriat ngai loh thu leh lo kal zinga chanve chu hmeichhia an ni tih a hmuin a lawm takzet thu a sawi a. Pensioner Adalat ni 2 chhungin an harsatna tihfel sak vek an tum thu leh an tihfel theih lote chu kar khat chhungin tihfel sak an tum thu a hrilh. One Rank One Pension hman tan a nih hnuah pension-te pawh nasa takin a khawih danglam a, pensioners leh an chhungte engemawzatin an sum lak zat tur hre lova, a ngai renga la late an awm tih hriain Defence Accounts Department chuan theihtawp chhuahin, ramchhung state tin tlawhchhuaka pension lak dan turah harsatna neite chu tihfel sak zel an tum a; dik tak leh langtlanga hnathawh an tum thu a sawi. Defence pensioner-te pension laknaah harsatna an tawh tam berna chhan chu Bank lamin armed forces peng 3 - army, air force leh navy - rank hrang hrang an hriatpawlh thin avanga pension zat tur an bituk sual fo thin a; hei pawh hi DAD chuan theihtawp chhuahin ex-servicemen-te an rank dik tak anga pension an hmuh theuh theih nan rampumah hmalak mek a ni, a ti.

Pensioner Adalat-ah hian Maj Gen Sukesh Rakshit, GOC 101 Area HQ leh Principal Controller (Pensions) Pu Praveen Kumar te pawhin thu sawiin Pensioner Adalat kaltlang hian ramchhung hmun hrang hranga ex-servicemen leh an chhungte nena inthlunzawm leh inbiakpawhna tha zawk an nei phah thin thu an tarlang a. Tun dinhmunah hian Bank 46000 kaltlangin defence pension pek chhuah mek a nih bakah Nepal ramah ex-servicmen nuai 1 chuangin pension an dawng bawk a; kum khata defence pension semchhuah hi cheng vaibelchhe 8700 chuang a nih thu leh OROP hnuaia pension pekchhuah tur hi installment 4-ah sem a nih tur thu an sawi a. Defence Pension Adalat hi kum 1987 atanga neih tan niin hmarchhak bialah Guwahati leh Shillong-ah te neih thin a ni a; nakum February 2017 khian Dimapur-ah neih an tum thu an tarlang bawk.