Mizoram University Campus chhunga KV School leh Civil Engineering Department building tharte chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM (Retd)-in a hawng.

MZU SET Complex-a hawnna inkawm MZU Vice-Chancellor Prof.R.Lalthantluanga kaihhruaiah Larsap chuan Mizoram University huamchhungah hmasawnna tam tak tunhnaiah hmuh tur a awm chu lawmawm a ti a. KV School tha tak Campus chhungah din a ni chu vanneihthlak a tih thu leh KV School atanga zirchhuakte chu mi chhawrtlak leh hlawhtling tak an ni chho zela a hriat thu a sawi. MZU hmunhma chu mawiin ramchhunga University campus zau berte zinga mi a ni a, hun reilote chhungin Department hrang hrang hawn belh leh building thar engemawzat sak a nih theih avangin Vice Chancellor leh MZU hotu dangte an fakawm hle a ni, a ti bawk. MZU hnuaiah Civil Engineering Department thar hawn a ni chu a lawmawm tih sawiin Pu Nirbhay Sharma chuan he Department-a zirlaite chu Mizoram leilung mil leh him tawk tur building sak dan tur zirchiang leh ngaihtuah chhuak turin a chah bawk.

Kendriya Vidyalaya, Mizoram University hi kum 2010 khan Class 1-5 neiin bultan a ni a, kum tin Class hawn belh zelin tunah chuan Class 11 thleng an nei mek a. KV School-ah hian zirlai 339 an awm a, a ngheta thawk zirtirtu 12 leh contract-a thawk 10 an nei a ni. KV School-ah hian Physics, Chemistry, Biology leh Computer Laboratories bakah school library changtlung a awm bawk. MZU hnuaia Civil Engineering Department hi kum 2014 khan 12th Plan hnuaiah hawn a ni a, tunah hian zirlai 30 an nei mek a ni.

Attachment

  • Loading attachment...