State Level Monitoring Committee for Private Television Channels chu Chairman Pu B. Lalthanliana, Secretary, I&PR hovin vawiin khan a vawikhatna atan a office chamber-ah an thukhawm a. Mizoram puma Cable TV te chu Cable TV Networks Regulation (Act) 1995 in a phut dan dinglaite mumal taka zawm tura hriat thar tir nise an ti.

Pu B. Lalthanliana, Chairman chuan he Cable TV dan dinglai te hi tunlai boruak en in thil pawimawh tak nia a hriat thu a sawi a. State Level Committee bakah District tina District Level Monitoring Committee on Private TV Channels te chu mumal taka hna thawk tura beisei an nih thu a sawi a ni.

Pi Lalnithangi, Director, I & PR chuan, he Committee hi tunhma deuhva lo kalpui tawh thin a nih thu a sawi a. Private TV te mumal taka kalpui a nih a, rules te mumal taka zawm a nih theih nan TV Operator te koh va, seminar neih tul a tih thu a sawi a ni.

Member ten Rules kenkawh kawnga hmalak tur tam an tih thu meeting ah hian sawilan a ni a. TV programme code leh advertisement code, dan anga zawm tul an tih thu an sawi a, film lehlin tam tak Cable TV a chhuah thin chu tawngkam hman leh a kalphung te a lo mumal zawk theih nan censor board din tul an tih thu pawh an sawi a ni.

District tina Committee ruat thar chu a rang thei anga meeting neia hmala turin State Level Committee chuan a ti a ni.