Surya Sanstahn, Noida, UP leh Mizoram University-a Department of Hindi tangkawp buatsaih ‘National Seminar on National Values in Hindi Literature of North east India’ chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd)-in MZU Auditorium-ah a hawng a. He ni 3 awh tur National Seminar hi Central Hindi Directorate, Ministry of HRD, GoI leh Mizoram sorkar-a Higher & Technical Education Department ten an thlawp bawk a; state pawn atangin Seminar chhim tur hian palai 60 chuang an lo kal a ni.

Mizoram Governor Pu Nirbhay Sharma chuan India-in zalenna a chan hnuah ram hruaitu hmasate chuan eng tawng nge national language-ah thlan tur tih an ngaihtuah khan ramchhunga chengte zinga tam berte tawng hman ‘Hindi’ chu thlan a ni ta a, hei hi chhimlam state te leh ramchhung hmun dangte pawhin a tirah an duh loh hle a; Hindi hi ‘national language’ ah ruat ni mahse ram inpumkhatna a thlen nghal kher lo a ni, a ti. Amaherawhchu, hun kal zelah Hindi chu ramchhungah zau zawka kalpui leh zirtir a ni chho a, hmarchhak bial pawh Hindi tawng hmang miahlo hnam tam tak chenna a ni a, sorkar laipui pawhin ramchhunga hnam hrang hrang inpawh leh inunau zual theih nan tawng inhriatpawh a tul a ni tih hriain Hindi zirtir/zir chu nasa takin a kalpui ta a, tunah chuan hmarchhak bialah leh Mizoram chhungah ngei pawh Hindi ziak, chhiar leh tawng thiam mi engemawzat an awm tawh a, a lawmawm hle a ni, a ti bawk. Hindi tawng chu khawvelah English leh Chinese tawng dawtah a tawngtu an tam ber a, chuvangin Hindi tawng thiltihtheihna (strength) hre rengin kan tawng bakah Hindi leh tawng dangte kan thiam belh  chuan nasa takin hma min sawn tir dawn a ni tih mipuiten i hria ang u, a ti. HIndi tawng la hmelhriat miah lohte tan a awlsam zawka an zir theih nan “user-friendly Hindi” kan uar a ngai a, tunlai thiamna leh internet hmangin e-book leh e-library kaltlang pawhin a tam thei ang ber Hindi thuziakte a duh apiangin an chhiar ve theih nan kan chhawpchhuah a ngai a ni tiin Seminar chhimtu mithiam rual a hrilh. Mizoram-ah Hindi tawng tih lar kan tum rualin Mizo hnamzia leh tawng te, Mizo thu leh hla te pawh state pawnah kan thehdarhpui a tul a, Mizo thuziak mite pawh state danga an inphochhuah ve na tur leh state danga literature mithiamte pawh Mizoramah kan sawm luh tam a ngai bawk a. India sorkar-in ‘Act East Policy’ chak taka a kalpui mek laiin Mizo-Hindi Hindi Akademi din a nih theih nan hma la turin a sawm bawk.

MZU Vice Chancellor Prof Lianzela pawhin thusawiin Mizorama Hindi a thanlen chhoh dan a tarlang a - Kum 1950-ah Mizoramah Hindi zirtir hmasak ber a nih hnuah rambuai avang khan Hindi zir chakna a tlahniam hle a ni, a ti a. Tun dinhmunah MBSE hnuaiah Class 8 thleng Hindi chu zir a ni a, HSS-ah chuan MICE leh Kendriya Vidyalaya ah chauh Hindi zirtir niin College level-ah GAC ah chauh Hindi Subject a awm bakah MZU hnuaiah Hindi Dpartment hawn a ni bawk tih a tarlang. 

Seminar hawnna inkhawmah hian Surya Sansthan Trust Secretary Pu Devendra Kumar Mittal, Delhi Literary Board Chairman Dr. Ramsharan Gaur leh HoD, Dept of Hindi MZU Prof. Sushil Kumar Sharma te pawhin thu an sawi a ni.