Govt T.Romana College kum 25 tlin lawmna Silver Jubilee puala Indian National Fellowship Centre (INFC), Mumbai nena tangkawpa an buatsaih ‘National Integration & Medical Camp’ chu an College Campus thar, Republic Vengthlang-ah vawiin chawhnu khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan a hawng. 

National Integration & Medical Camp hawnna inkhawmah Mizoram Larsap chuan College faculty leh zirlaite duhsakna chibai bukin Jubilee puala hnam inpumkhatna leh hriselna hawi zawnga hun an ruahman chu a lawmawm hle a ni, a ti a. Mizoram-in duhthusam ram nuam, boruak muanawm tak, sik leh sa thiang tak leh thing leh mau a hausakna a nei chungin a chhunga chengte nunphung (lifestyle)-in a zir loh avanga hriselna lamah harsatna an neih thin chu a pawi a, a bik takin Mizo thalai te leh he state mipui ten nundan dik zawk, vaihlo leh ruihhlo tel lova ei leh in hrisel zawk kan uar deuh deuh a, Zoram nuam lehzual siam turin a chah a. INFC pawhin hma an rawn la ta sa sa, hriselna lam umzui a, free medical camp rawn buatsaih thin turin a sawm bawk. Mizo mipuite chu kawng tam takah entawntlak leh chhuanawm an nih rualin tawng an thiam tlemna chuan khawvel zau zawka an hlawhtlinna tur a dal tlat a, chuvangin tawng dang, a bik takin English leh Hindi thiam turin tan lak a ngai a ni, a ti bawk. 

National Integration & Medical Camp-ah hian Mumbai, Pune leh Mangalore atangin Doctor 3 leh zirlai 12, NIIT Mumbai atangin Professor 1 leh NIFT Coordinator te an lo kal a, tunkar chhungin College Campus thar, Repuiblic Vengthlang-ah a duh apiang tan free medical camp an buatsaih ang a,  ni 30.3.2017 (Ningani) khian Tachhip khuaah free medical camp hi an buatsaih dawn a ni. 

Vawiin Camp hawnna inkhawmah hian Govt T.Romana College Principal Dr.Lalrintluanga bakah INFC Coordinator Pi Pooja Kamath leh Republic Vengthlang LC Chairman ten thu an sawi a. Dr.Malsawmliana Convener-in Jubilee lawmna report pein Asst Prof. Rosy Lalrinsangi’n lawmthu sawiin hun a khar a ni. 

Govt T.Romana College hian an Silver Jubilee pualin programme hrang hrang an hmang chho mek a. Aizawl DC Office te nen tangkawpin ‘Save Chite Lui’ hnatlang an nei tawh a, National Disaster Response Force, Rajasthan te nen chhiatrupna laka inven dan zirhona te bakah College an ‘adopt’ Tachhip Village-ah research projects engemawzat an kalpui mek a ni.