Nimin tlai khan Chief Minister Pu Lal Thanhawla chu Hmarchhaka State Bank of India hotulu, General Manager North East Circle II Pu Panna Lal Das chuan a chenna inah hmuin Mizoram leh Hmarchhaka SBI hnathawh leh hmalakna te a hrilh.

Chief Minister Pu Lal Thanhawla chuan SBI in Mizoram tan a tir atangin nasa takin hma a la a, sawrkar bank dawr ber pawh a ni a, tehfung pawimawh tak , mipui atanga peipunna atana sum an hmuh atanga mipui hnenah sum puktur an thehchhuah, Credit Deposit Ratio (CD Ratio) chu bank dang aiin a sang a mahse chuti chungin RBI duhdan za zela 60 a la tling lova, chuvangin a san theih nan hmalakna awm se tiin a duh thu a sawi.

Pu Panna Lal Das chuan SBI chu rampum mipuite ta ani a, mipuite awlsam nan Mizoram ah pawh tunlai banking technology thar an chhawpchhuak zel a, Mizoram leh mipuite tan theihtawp an chhuah zel tur thu Chief Minister a hrilh a. Chief Minister chuan thingtlang lam khawsak chawikan nan leh eizawnna kawng an insiam theih nan, hmeichhia te tan Self Help Group pawimawh thu sawi langin Self Help Group te chu an hnathawh that zirin duhsak zel turin leh sum puk kawngah pawh awlsamna siamsak turin SBI hotulu hi a ngen a ni.

SBI hian Mizoram pumah tunah Branch 45 an nei mek a, Mizoram Rural Bank pawh hi SBI sponsored bank ni.