Vawiin khan Chief Minister Pu Lal Thanhawla chuan Vanapa Hall kawt  ah NLUP 4th Phase hnuaia Commerce & Industries Department in NLUP beneficiaries 85 te hnenah Auto Rickshaw hlanna programme an buatsaih a hmanpui a. Programme ah hian Chief Minister Pu Lal Thanhawla leh Home Minister leh NLUP Nodal Minister ni bawk Pu R. Lalzirliana ten heng Auto 85 hi an vailiam a ni.

Chief Minister leh NLUP Apex Board Chairman ni bawk Pu Lal Thanhawla chuan Sawrkar Flagship programme NLUP hlawhtlinpui mi tam tak an awm mek chu a lawmawm tiin rinawmna, dikna, taimakna leh Pathian tihna nung nena dawng te chuan an tangkaipui hle in eizawnna kawng hrang hrangah Mizoram dung leh vangah an dinchhuah pui mek a, heng mi hlawhtling leh mi taima te hian Mizo hnam hming pawh an ti tha a. Mahse hengte tel lova dawngtute leh a zelthel zawnga kalpui te chu tanpui leh ngaihna a awm lo a ni, a ti a. Vanduaina avanga rahbi tleu laklawh te tanpuina tur, tang te tanpui dan chu Sawrkar Programme thar New Economic Development Programme (NEDP) ah ruahman chhoh mek thu a sawi a. Mahni kea mipuite an din thei nan NLUP hmangin Sawrkarin theihtawp a chhuah thu sawiin mahnia intanpui tumte chu Pathian pawhin a tanpui thin a mahse titha peihlo  hlawhchham te lakah hian mawhphurna kan nei lovin ka hria a ti bawk.  

Auto Rickshaw Trade chungchang sawiin Chief Minister chuan leh he Trade hi Trade hlawhtling pawl tak niin eizawn nan leh dinchhuahpui nan a hman theih nghal a, taima leh rim taka thawk thenkhat te chuan  Auto thawhchhuah atangin Taxi te leiin a hlawhtlinna chu an tihpung mek a ni, a ti. Tun tuma Auto Rickshaw dawngtu NLUP beneficiaries 85 te chu hlawhtling tura duhsakna hlanin, an chhungkaw dinhmun siam tha a, eizawnna ngelnghet an hmuhna piah lamah an khawtlang theuh a, a mamawhtu leh khawtlang tan malsawmna ni tura chahin beneficaries dangte tan entawntlak ni turin a fuih a ni.

Vawiina NLUP 4th Phase hnuaia, Commerce & Industries Department in Auto Rickshaw semna programme an buatsaih ah hian Commerce & Industries Department, Director, Pu J. Hmingthanmawia  hnen atangin Technical Report tawi ngaihthlak a ni.  

He programme ah hian Finance Minister Pu Lalsawta, Industries & Commerce Minister Pu H. Rohluna, Sericulture Minister Dr. B. D. Chakma, Deputy Chief Whip Pu R.L Pianmawia, Parliamentary Secretary - Pu Hmingdailova Khiangte leh Pu Joseph Lalhimpuia te bakah MLA engemaw zat an tel bawk a ni.

Vawiina NLUP beneficiaries 85 te hi District 6 a Cluster hrang hrang a mi te an ni a. Aizawl District atangin beneficiaries 23; Lunglei District atangin beneficiaries 27; Champhai District atangin beneficiaries 17; Kolasib District atangin beneficiaries 8; Serchhip District atangin beneficiaries 8 leh Saiha District atangin beneficiaries 2 an ni a. Auto Rickhaw Trade 4^th Phase ah hian beneficiaries 109 a awm a, 85 in an dawn hnu hian dawng lo beneficiaries 24 an awm a, hengte pawh hi hun reilotea Auto hlan a nih theih nan ruahmanna siam mek a ni.  

Auto Rickshaw pakhat man hi cheng 1,22,000 niin TVS Company siam, TVS King Model, 4 stroke, 199.26 cc a ni. Auto dawngtu te hrilhriatna leh a tul dangte buaipui nan High School Field ah tul te inhrilhna hun buatsaih a ni nghal bawk.  

Mizoram Sawrkar Flagship programme NLUP ah hian Industries Sector hnuaiah hian main trade 24 leh minor trade 40 zet dah a ni a, NLUP Phase hrang hrang hnuaiah beneficiaries 26914 an awm mek a ni.