MPSC kaltlanga tun hnaia Mizoram Civil Service leh Mizoram Information Service tling tharte chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM (Rtd) chuan Raj Bhawan-ah kawmin an hnathawh zelnaah duhsakna a hlan.

Mizoram Larsap chuan officer tharte fuihin sorkar-ah hna pawimawh tak leh mawhphurhna sang tak an kengkawh chho dawn a, chuvangin an thiltihtheihna hmangin mipuite tana rawngbawl turin leh ram hmasawnna kawngah rahbi chhinchhiah tlak siam tura a duh thu a hrilh a. Mizoram chu state ralmuang tak leh khawtlang tangrual tak a nihna chu ram hmasawnna atan duhthusam a ni chungin mipuite nunphung (lifestyle) hriselna zawk an neih loh chuan Mizote chu an dingchhuak thei tak lovang tih a hlauh thu a sawi a. Tuna officer tharte chu an thalaipuite leh anmahni ngaisangtute tana entawntlak ni turin an nunphungah leh hnathawhna kawngah theihtawp chhuah turin a chah.