Vawiin chawhma khan Sub- Hqrs. YMA Conference Hall, Lunglei ah World Vision buatsaihin ni 28th March- 3rd April 2017 chhung Training on Handicraft and Mushroom Cultivation for Women Self Help Group (WSHG) chu Lunglei Bawrhsap Pi Lalzarmawii IAS chuan khuallian niin a hawng.
Pi Lalzarmawii chuan thusawiin Sorkar laipuiin hmeichhia te a ngai pawimawh hle a, Self Help Group hmeichhia te tan a bik a tih hi hmang tangkai tur leh hlawhtling thei ang ber a hman a duhsak a. Mizo product atam thei ang ber phochhuah hi a pawimawh a, State dang leh ram pawn thleng a phochhuak thei khawp a nalh leh mawi a siam thei tura zir theuh turin a chah a. Mi tam tak in a an lei chak tur khop a mawi leh nalh a siam chhuak theuh turin a chah a. Chhungkua chawmtu ni thei tura tan la theuh turin kalkhawm te a chah bawk.
Inkhawm hi Pu Thanglunpaua Guite, Project Co-Ordinator, WSHG Project, Lunglei District leh Co-ordinator Development Facilitation Chhimtuipui Area Program, World Vision India in kaihruaiin Women Self Help Group hi Ministry of Finance Govt. of India chuan NABARD kaltlang a scheme a siam leh bultum (Sponsor) a ni a. WSHG Project hi Lunglei District ah 29th Nov. 2012 atang a kalpui a ni a, he project in a tum ber chu hmeichhia te chawikanna, anmahni kaltlanga chhungkua tana eizawnna nghelnghet siam a, retheihna umbo ani a ti. Tunah NABARD hnuaia World Vision enkawl WSHG project hnuaia Lunglei District chhungah hian WSHG hi 889 din a ni a, heng zing a 146 ten Bank kaltlangin Loan Rs.96,90,000/- la in eizawnna hrang hrang Ar Vulh, Vawk vulh, Puantah, Puanthui, Sumdawnna tenau, Mombati siam, Bhujia siam leh trade hrang hrang hmangin bul tan mek a nih thu a sawi.
Pu Lalrokunga Chhakchhuak DDM, NABARD pawh in thusawiin hetiang a WSHG te hnen a training pek hian sum tam tak hailuhna leh Loan rulh that a pun a ring thu a sawi a, Bank te nena inlaichinna tha nei chuan Loan lakah buaina tur a awm loh thu a sawi a ni.
He training ah hian WSHG member 90 an tel a ni. Handicraft hi Hnam Chhantu Pawl ten training an pe ang a, Mushroom Cultivation hi Horticulture Deptt. ten training an pe bawk ang.
