Vawiin khan Mizoram Governor Lt Gen Nirbhay Sharma, PVSM, UYSM, AVSM, VSM (Rtd) chuan Raj Bhawan Heritage Building sakthat chu a hawng a. He hunah hian Governor nupui Pi Jyotsna Sharma, Mizoram Chief Minister Pu Lal Thanhawla, Speaker Pu Hiphei, Ministers, Ministers of State, Parliamentary Secretaries, Opposition Leader Pu Vanlalzawma bakah Mizoram sorkar officials pawimawh engemawzat an tel. 

Raj Bhawan Heritage Building hawnna inkhawm Principal Secretary Pu Lalram Thanga kaihhruaiah Mizoram Governor Pu Nirbhay Sharma chuan kum 1898-a sak tawh Raj Bhawan chu INTACH Mizoram kaltlangin ‘heritage site’ ah puan a nih angin tuna he building thawmthat leh cheithatna pawh a tira a landan (design) ang theih bera sakthat a ni a, a hmanruate pawh a thei anga tam chu a tira mi vek kha hman a nih thu a sawi a. Raj Bhawan sakthat chungchangah PWD changtu Mizoram Chief Minister Pu Lal Thanhawla pawhin a phurpui leh theihtawpa hma a lakpuina zawng zawngah lawmthu a sawi bawk a. Hun chep tak karah Mizoram PWD ten theihtawp chhuahin heritage building thar mawi tak an peih hman chu fakin Raj Bhawan huamchhunga building dang Governor’s Secretariat Office leh Durbar Hall lam pawh sakthat vat a nih theih a beisei thu a sawi bawk. Raj Bhawan chu Governor chenna mai ni lovin Mizoram leh Mizo mipuite hmel lanna ber hmun pawimawh pakhat an nih avangin uluk tak leh mawi taka sak a, a enkawl zuinaah pawh theihtawp chhuah zel a pawimawh ang, a ti. 

Mizoram Chief Minister Pu Lal Thanhawla pawhin thu sawiin Raj Bhawan chuan Mizoram history-ah hmun pawimawh tak a luah thu a tarlang a - a hmasa berin Superintendent of Lushai Hills chenna niin Mizoram Union Territory-a puan a nih hnuah ‘Raj Niwas’ tih a ni a, Mizoramin statehood a neih hnuah ‘Raj Bhawan’ tia hriat a ni ta a ni, a ti. Kum 1953 khan India Prime Minister hmasa ber Pandit Jawaharlal Nehru Mizoram a lo zin khan Raj Bhawan  ngeiah a thlen thu a sawi a. Chief Minister chuan 13th Finance Commission hnuaiah Raj Bhawan sakthatna tur sum pek a ni a, INTACH Mizoram Chapter hmalakna avangin hmun hlui humhim tur ‘heritage site’ ah puan a ni ta bawk a; a building hlui ber pawh hi a hmaa a ruangam (original structure / heritage character) ang thei bera sakthat a nih theih chu a lawmawm hle a ni, a ti bawk. Mizoram Governor Pu Nirbhay Sharma chuan Raj Bhawan sakthat hna chu a tuipuiin uluk taka sakthat a nih leh theih na theihtap a chhuah avangin lawmthu a hrilh a. Sapho hunlaia sak Raj Bhawan heritage building chu a hmel danglam mang lova cheithat a nih theih nan Mizoram PWD ten theihtawp an chhuahna chungah lawmthu a sawi bawk. 

Vawiin Raj Bhawan Heritage building sakthat hawnna inkhawmah Er.Henry Lalmuankima, Chief Engineer (Buildings), Mizoram PWD atangin technical report ngaihthlak a ni a; PWD E-in-C Er.R.Vanlaltluanga-in lawmthu sawiin hun a khar a ni.