‘Friends of the Hill People for Peace Expedition’ an kalpui mekah 39 Assam Rifles chuan mipuite hriselna lam ngai pawimawhin tukin zing khan ‘Run for Fun’ a huaihawt a. He hun hi Mizoram Governor Lt Gen (Rtd) Nirbhay Sharma, PVSM, UYSM, AVSM, VSM-in hmanpuiin ‘Run’ hi a vailiam.

Khuallian Mizoram Larsap chuan Assam Rifles-in hmarchhak state 3 - Mizoram, Tripura leh Assam - fang chhuaka ‘Expedition for Peace’ a nei thei hi a vanneihthlakin a lawmawm hle a ni, a ti a. He Expedition hi October ni 13 khan Parva-ah intanin Rajivnagar kaltlangin Tripura a lut ang a, chuta tang chuan Karimganj atangin Assam-ah lut lehin Tezpur thleng khaw kilkhawr tak tak a tlawh chhuak dawn a, Assam Rifles sipaiten ke, motor, lawng leh thirsakawr hmangin state 3 an tlawh chhuak tur chu an ngaihsanawm hle a ni, a ti bawk. Expedition hian remna leh muanna thupui a ken bakah an thlen chinah hriselna leh faina, ruihlo do, zirna leh eizawnna chungchangah mipuite hrilhhre zel turin a chah.

Run for Fun-ah hian YMA, CRPF, BSF, NCC, MZU leh Assam Rifles atangin mi thahnem tak an tel a. Mizoram Governor bakah Inspector General Assam Rifles (East) Maj Gen MV Chandran, YSM, SM ten an an hmanpui a ni.

39 Assam Rifles (‘Patkai Hills Battalion’ tia hriat lar) Commandant Col AN Mukhopadhyay chuan Mizoram mipuite nena an inlaichinna tha siam zel turin Assam Rifles chuan theihtawp a chhuah reng a ni, a ti.