Vawiin chawhma dar 11:00 khan Mizoram Governor Lt.Gen.Nirbhay Sharma,PVSM,UYSM,AVSM,VSM(Retd) chuan Copter hmangin Saiha-ah a lut a. Helipad atangin amah hmuahna hmun DC’s Conference Hall kawt pan ding nghalin, Guard of Honour a chhan zawhah,  DC office complex-ah Mizoram State Thing “Herhse” tiak a phun nghal a ni. He mi zawh hian Conference Hall-ah Mizoram Sawrkar hnuaia Head of Office te meeting a neih pui nghal a. Head of Office te chu mahni hna chanpual theuhva thahnem ngaitaka thawk turin a chah a ni.

Conference Hall atangin  MADC kawta amah lo lawmna hmun chu chhun dar 12 ah a thleng a.  Hetah hian thu sawiin, Governor chuan Sipai-ah kum 40  a tan chhung khan Border Area a chengte leh tlang rama Tribal chengte bulah a khawsa nasa a, Tlangrama chengte hi in nun a thianghlima, in nihna ang anga lang thin, hnam rinawm tak in nih a, in bula chen nuam ka tih  hle a ni, a ti.  Governor Pu Sharma chuan mahni inring tawk mi chu an hlawh tling thin a, chuvangin kan MADC hruaitute leh kan upa te ho  hian kan Thalai te hi mahni inrin tawkna nei turin kan fuih fo thin tur a ni, a ti. Saiha District atang hian Zirna-ah te, Sports-ah te leh thil dang dangah in  thalai ten hlawhtlinna an lo chang tawh thin a nih tih ka hria a, chutiang in thalaite hlawhtlinna chanchin dang chu ka lo ngaiven reng dawn a ni, a ti bawk. Governor hian CEM Conference Hall-ah MADC hruaitute a kawm a, MADC hotute chuan  Sixth Schedule Amendment leh District Sainik Board din chungchangah te  Governor tanpuina chu ngenin Memorandum an thehlut nghal a ni.

Governor Lt.Gen. Nirbhay Sharma, PVSM,UYSM,AVSM,VSM(Retd)  hi Pu Hiphei Speaker, Mizoram Legislative Assembly leh  Pu H.Zothangliana, Parliamentary Secretary  ten an tawiawm a ni.