NLUP Implementing Board (NIB) Chairman Pu J.H. Rothuama, MLA chuan nimin leh vawiin khan Hliappui NLUP Bawng vulhtute a tlawh. Pu JH Rothuama hi a thiannu Pi Denghmingliani bakah, NIB Secretary Pu James Lalrinchhana, Pu David L. Thangliana, Chief Media Officer leh Pu T. Lalramzauva, P.S ten an tawiawm a ni.

Hliappui khua hian NLUP hnuaiah bawng an thlang deuh vek a, mahse an khua in an mamawh dawn a hriat avangin NLUP benefeciaries pathum chu Industry Trade thlan tir an ni a, bawng vulh ah hian an hlawhtlin em avangin Pu Rothuama hian a han tlawh a ni.

Pu JH Rothuama chuan NLUP tlangbawng vulhah Hliappui khua chu ti tha ber an nih a rin thu sawiin, Society te siama nasa taka hma an la chu lawmawm tiin, an khua a ram zau tak bawng tlatna hmun (grazing ground) ah an siam a, duh tawka bawng eitur, bawngchaw an hlui thin chu lawmawm a tih thu sawiin Mizoram chawm thei tur bawngsa leh bawnghnute an la neih ngei a beisei awm thu a sawi.

Hliappui khaw mi tam zawk chuan tlangbawng, sial leh sakawr te an vulh a, mi pakhat in bawng 30 chuang NLUP 1st phase an dawn atanga an neih tawh thu te an sawi a ni.

He khaw hruaitute chuan AH & Vety Department mi leh sa pakhat mah an khua ah an awm loh thu leh heti khawpa bawng vulh hlawhtling an nih avangin Vety Officer pakhat talin thut chilh thei se an duh thu leh an bawngvulh hlawhtlin zual theih nana an mamawh hrang hrangte NIB Chairman hi an lo hrilh a, Pu Rothuama chuan hotu sang zawkte hnenah Vety Doctor an neih theih nan a lo sawipui tur thu sawiin, Bawng tlatna hmun hungna tur te leh thil tul dang engemaw zat NLUP atangin a pe bawk a ni.

Pu Rothuama hian Kawlkulh khuaah pawh V/C hruaitute leh NLUP VLMC hotute kawmna neiin an mamawh leh harsatna an thlente enzui pui a tum thu a hrilh a. Vawiin khan Aizawl a lo lut leh a ni.