Vawiin khan Parliamentary Secretary leh Tuirial bialtu MLA ni bawk Pu Hmingdailova Khiangte chuan Thingdawl a Higher & Technical Education Department ruahmanna hnuaia Polytechnic sak leh Health & Family Welfare Department-in Nurse zirna hmun tur GNM School an sak te chu a hmunah kalin heng Department pahnih aiawhte leh khawtlang hruaitute nen building sak te leh a hmunhma te chipchhiar takin an tlawh chhuak vek a ni.

Pu Hmingdailova Khiangte chuan Polytechnic leh GNM School building atanga hmun tam takah misual ten wiring an chep chat leh electric wire an ruk chu pawi tiin hetiang Sawrkar building, khawtlang leh ram tana thil chhenfakawm leh tangkai la ni tur an suamsam duh chu a Kristian lovin a Mizo lo a ni, a ti. Polytechnic buiding sak te hi a sak dan leh hna uluk dan, quality leh workmanship chu tha nia a hriat thu a sawi bawk a. Khawtlang hruaitu te chuan heng pawikhawihtu te hi a then chu man niin jail lamah pawh an tan tawh thu an hrilh a, a khua ang pawhin helai hmun hi an veng reng dawn a ni, an ti.

Polytechnic leh GNM School te hi Thingdawl khua atangin km khat vela hla a ni a, a bul hnaiah chenna in dang a awm lova, rukru leh misual lakah building leh a hmun hma te veng turin PWD in Polytechnic veng turin leh Health & Family Welfare Department-in GNM School veng turin mi an dah tawh a ni.

Thingdawl Polytechnic hi Sawrkar Laipui sum bultuma sak niin a complex chhungah hian building pali – Administrative Block, Electrical Trade Building Block, Automobile Trade Building Block leh Multipurpose  Hall-cum-Library Building te a awm a. He Polytechnic sak nan hian cheng nuai 1230 ruahman niin a building sak nan cheng nuai 800 sen a ni a, a bang chu bungrua hrang hrang mamawh ‘necessary and required equipment’ lei nana ruahman a ni a. Building pali hi sak zawh tawh vek a ni a, equipment erawh a sum a thlen loh avangin lei a la ni lo. Building sak hna hi 2011 khan tan niin nikum September khan zawhfel a ni. 

GNM School ah hian Classroom awmna Main Building leh Girls’ Hostel Building te a awm a. Main Building hi cheng nuai 249 senga sak a ni a, a sak hna hi January 2013 khan tan niin August 2014 a zawhfel a ni a. Girls’ Hostel Building hi cheng nuai 210 senga sak a ni a, a sak hna hi November 2012 khan tan niin August 2013 khan zawhfel a ni.

Hemi hnu hian Parliamentary Secretary chuan Thingdawl Khawhlui hmuna Sports Complex sakna tur Mizoram State Sports Council in an ruahman chu a hmuna kalin a tlawh leh a. He Complex sak nana sum mamawh tur hi Mizoram State Sports Council chuan sawrkar laipuiah an dil mek a ni.