Vawiin chawhnu dar 1:05 khan Governor Lt. General Nirbhay Sharma PVSM,UYSM,AVSM,VSM (Retd) chuan Lawngtlai a tlawh a, DC Conference Hall-ah Lawngtlai khawpuia District Officers ho te, Lai Autonomous District Council Members te leh Chakma Autonomous District Council Members te chu a hran theuhvin inkawmna a neih pui a, DC Complex ah thing (Ashoka Tree) a phun bawk.

District Officers hote nena an inkawmnaah hian Governor chuan Lawngtlai District chu Myanmar leh Bangladesh ramten an ri avangin ram dang mi dan lova lut ru an tam thei a, hei vang hian Assam Rifle te, Border Security Force te leh State Police te chu inpawh tlang taka venhimna hna thawkho thin turin a chah a, Lawngtlai District chhunga ziak leh chhiar thiam an pun theih nan te, nau piang boral an tlem theih nan te, hriselna kawnga chak zawka hmalakna a awm theih nan te leh thil dangah awareness tam zawk nei tur leh kohhran leh tlawmngaipawl te nena nasa zawka thawkho turin a chah a ni. Thalai tam zawk sipaiah an tan theih nan District chhunga awmsa sipaite nen inpawh zawka hma laa, ruahmanna zawng thin turin a hrilh a, Kaladan Multimodal kawng laih mek leh Kolodyne HEP hmalak mekah theihtawp chhuah a tum thu a sawi bawk. Governor Lt. Gen Nirbhay Sharma chuan lehlanga rawn kal ka nih avangin hun a chep rih sia, hun tam zawk neihpui tur che u in ka rawn tlawh leh ang che u, a ti a ni.

District Officers hote nena inkawm honaah hian Lawngtlai Bawrhsap Pu J. Hmingthanmawia chuan Governor lawmna thu leh Lawngtlai District chanchin tlangpui sawina hun a hmanga, Superintendent of Police Pu Lalringdika’n Lawngtlai District Security dinhmun report a pe bawk a ni.

Hemi hnu hian Governor hian Lai Autonomous District Council a Member te kawmna a nei leh nghal a, Council member ten harsatna an neihte hrilhin hmalak dan tur hrang hrangte a sawipui nghal a ni. Larsap hian langtlang leh fiah ngama hnathawk thin turin Council hotute hi a fuih a, harsatna an tawhte chu Aizawlah pawh a tul ang zela sawipui theih a nih thu a hrilh bawk. LADC Member te hi CEM mawhphurna chelh mektu Pu F. Hranglura’n a ho a ni.

Lai Autonomous District Council hotute nen an inkawm zawh hian Chakma Autonomous District Council Member te nena inkawm hona an nei zui leh nghal a, chakma area chhunga hmasawnna hna thawh dan leh hma lak zel dan turte, harsatna an tawh mekte chu Larsap hian a sawipui a ni. CADC Member te hi CEM Pu Buddha Lila Chakma in a ho a ni.

Governor hian Helicopter in Lawngtlai hi a thleng a, Helipad ah Lawngtlai Bawrhsap Pu J. Hmingthanmawia, Superintendent of Police, Pu Lalringdika, leh LADC leh CADC CEM ten an lo hmuak a. Larsap hi Aizawl atangin Mizoram Assembly Speaker Pu Hiphei leh Parliamentary Secretary Pu H. Zothangliana ten an tawiawm a ni.

Meeting pathum a neih zawh hian Lawngtlai Circuit House ah chhun chaw a ei a, chawhnu dar 3 khan Aizawl panin a thlawk chhuak leh nghal a ni.