Vawiin khan Mizoram State Olympic Association (MSOA) chuan an Sr.Vice President, Sports Minister Pu Zodintluanga hovin a pisa-ah Executive Meeting an nei.

Meeting ah hian kum tina neih thin International Olympic Day, June ni 23 hman dan tur an rel a. Kum danga Olympic Day Run neih thin dan ang ni lovin kuminah hian a duh apiang tel theihna tur intlansiak, Long Distance Run buatsaih nise an ti a, he intlansiakah hian mipa leh hmeichhia tlanchak sawm chin hnenah lawmman sem a ni ang. Pakhatna lawmman cheng 5000, pahnihna lawmman cheng 3000, pathumna tan lawmman cheng 2000 leh palina atanga sawmna chinin consolation prize an dawng bawk dawn a ni.

Long Distance Run buatsaih tur hian MSOA chuan an Secretary General Pu C.Laltlanthanga Chairman-na hnuaiah organising committee an din a. Intlansiak hi June 23, zing dar 6 ah Bawngkawn atanga tlan tanin Ramhlun paltlangin Lammual thleng an tlan dawn a ni.

Meeting ah hian MSOA Secretary General Pu C.Laltlanthanga’n September 19, 2014 atanga June 10, 2015 inkar chhunga an hmalakna a report a. An pawl sum dinhmun ngaihthlakna neiin 2015-2016 chhung atan budget cheng nuai 20 an pawm a ni. International level-a player leh official te hnena pocket allowance pek thin pawh chhunzawm leh ni se an ti bawk.