Vawiin khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chuan Tlabung, Mamit leh Tuipuibari a tlawh a, Governor hi FCS&CA Minister Pu John Rotluangliana leh West Tuipui bialtu MLA Pu NK Chakma ten an tawiawm.

Tlabung Zodin Indoor Stadium-a ama lawmna inkhawm SDO(C) M.Misaela kaihhruaiah Mizoram Governor chuan inkalpawhna kawng chhiat vanga Tlabung leh a chhehvel mipuite harsatna a hriatpui thu a sawi a. Inkalpawhna kawng chu mipui khawsakphung nghawng a nih avangin a pawimawh a, Tlabung mipuiten inkalpawhna kawng tha zawk an neih theih nan sorkar hotute pawh he mi chungchanga hmalak dan tur a sawipui tawh thu a sawi. Zuk leh hmuam laka fihlim lo an tam chu pawi a tih thu leh hriselna a tihchhiat theih avangin hemi kawngah hian taksa vawn thianghlim a tul thu a sawi a; inbiakpawhna kawnga harsatna hrang hrang sutkian na'n tawng thiam tam a pawimawh tih a sawi bawk. Pu Nirbhay Sharma chuan Mizoram mipui nuai 10 chuang zingah hna thawk thei dinhmuna ding mi nuai 5 vel an awm a rin thu sawiin, chung mite thawh tur chu sorkar pek vek theih a ni lo tih a sawi a, sorkar hnuaia thawh kher tum loa mahni intodelh a tul a ni a ti a. Mizo thalai tam zawkin sipai nih an tum thin chu lawmawm a tih thu sawiin, Tlabung-a BSF te nen tangho a, sipaia lut tum thalaite tan training neihpui turin a chah. Larsap-in thu a sawi zawh hian mipuite nen an inkawm zui nghal a, zawh duh neite tan hun hawn niin, kalkhawmte zawhna chu larsap hian a chhang nghal zel a ni.

West Tuipui Bialtu MLA Pu Nihar Kati Chakma pawhin thu sawiin Mizoram state mipuite hmakhuaa ngai thiam tak Governor kan nei chu a vanneihthlak hle a; Tlabung pawh vawi hnih a tlawhnaah hian Governor chu lawmthu a hrilh bawk.

Vawiin vek khan Mizoram Governor Pu Nirbhay Sharma chuan Mamit a tlawh a. Mamit DC Pi Lalbiaksangi hovin sorkar offcials leh khawtlang hruaituten Mamit Chhimveng YMA Hall-ah amah lawmna inkhawm an buatsaihah Larsap chuan Mamit DC kaihhruaina hnuaiah Bru lak kir hna tluang taka thawh mek a nih chu lawmawm a tih thu a sawi a. Mamit District chu hmasawn chak leh thawk tha nia a hriat thu sawiin sorkar officials leh Mamit mipuite lawmpuina thu a sawi bawk. Mizoram state chhunga cheng zawng zawngte chu hnam leh sakhua hrang ni mahila inpumkhat thiam a kan tanrual hi a pawimawh ber a ni, a ti.

Mizoram Governor hian Tuipuibari-a 181Bn BSF hmun pawh tlawhin ramri ven hna an thawh dan te a sawipui a, an bul vela chengte nen inlaichinna leh thawhhona tha nei turin hrilh a. Governor hi vawiin tlai vek khan Aizawl a lo kir leh a ni.