Nimin (11.11.2016) tlai khan Chief Minister Pu Lal Thanhawla, Union Railways Minister Pu Suresh Prabhakar Prabhu leh Minister of State for Railways Pu Rajen Gohain te chuan Raj Bhawan ah inkawmhona tha tak an nei.

Union Railways Minister Pu Suresh Prabhakar Prabhu chuan Chief Minister chu Hmarchhak atana Railways hmathlir buatsaih mek anih thu hrilhin he hmathlirah hian enge tha ang a, enge tih chi ang tih te leh a ram mipui te mamawh enge a nih tih te chu ngaihtuah ani dawn tiin he hmathlirah hian thurawn pe turin a ngen a. Chief Minister chuan railways hmasawn zel atan hmathlir tha leh zau tak neih chu tha a tih thu sawiin Hmarchhaka rel kawng tih hmasawn nan thil pawimawh tak anih a beisei thu a hrilh. Chief Minister chuan Myanmar a zin chanchin hrilhin China in nasa takin Myanmar ah hma lakna hrang hrang a neih mek thu te a sawi a.

Railways Minister chuan China-in heti khawpa hma a sawn nachhan chu rel kawng a neih that vang leh chu chuan hmasawnna hrang hrang a thlen chhoh vang anih thu te a sawi a. Strategic chungchangah chauh nilo kawng hrang hranga hmasawnna a thlen theih nan rel kawng hi Hmarchhak tan a bik takin a pawimawh a ni tiin Hmarchhak chu nasa takin ngaihpawimawh mek anih thu a sawi.