Zan khat riaka Mizoram rawn tlawhtu Union Railways Minister Pu Suresh Prabhakar Prabhu chuan vawiin tlai khan Mizoram Governor Lt. Gen (Rtd) Nirbhay Sharma, PVSM, UYSM, AVSM, VSM nen Raj Bhawan-ah an inkawm.

Mizoram Governor chuan sorkar laipui hmalakna zarah Mizoram khawpui Aizawl atanga km 20 maia hla Sairang-ah relkawng a lo lut dawn ta chu hmasawnna rahbi ropui tak a tling a ni, a ti a. Mizoram chu international border thui tak Myanmar leh Bangladesh nena intawm a nih avangin inkalpawhna leh inbiakpawhna changtlung a mamawhzia Union Minister a hrilh a; hmarchhak bial leh a bik takin Mizoram hmasawnna tura hnathawh chu hmanhmawh taka tih rem lo mahse hmalakna reng reng chu felfai leh uluk taka thawh a tul a ni, a ti.

Union Railways Minister Pu Suresh Prabhu chuan Mizorama relkawng an sialnaah hna hautak mahse sorkar laipui chuan theihtawp chhuah a tum thu Governor a hrilh a, a tul chuan Defence leh Transport Ministry tangkawpa mamawh sum pawh ngaihtuah theih mai a beisei thu a sawi. Sorkar laipui chuan hmasawnna a kalpui dan turah hian hma hun thui tak thlir chungin hnathawh zel a tum thu a sawi bawk.

Vawiin tlaia Mizoram Governor te nupa nena an inkawmnaah Union Railways Minister hi a nupui Uma Prabhu bakah Minister of State Pu rajen Gohain, General Manager (Construction) NR Railway Pu HK Jaggi leh Chief Administrative Officer (Construction) NF Railway Pu AK Yaday ten an tawiawm a ni.

Mizoram Governor chuan Union Railways Minister Pu Suresh Prabhakar Prabhu pualin Raj Bhawan-ah zanriah a buatsaih sak bawk a; he hunah hian Mizoram Chief Minister Pu Lal Thanhawla leh a nupui Pi Lal Riliani, Mizoram Transport Minister Pu John Rotluangliana, Parliamentary Secretary Pu TT Zothansanga, Chief Secretary charge latu Pi Renu Sharma bakah Railways Ministry officials engemawzat an tel a ni.