Vawiin khan Jhunjhunu, Rajasthan-ah Shri Jagdishprasad Jhabarmal Tibrewala University (SJJTU) chuan  Annual Convocation vawi 7-na an hmanga. He hunah hian vantlang rawngbawlna  huanga  ahun tam zawk hmang thin, Mizoram Governor Kummanam Rajasekharan chuan  a hnathawh that avang te leh mipui harsatnate su kiang tura hlawhtling taka a lo penchhuah thin  avangin honorary  Doctor of Letters( D.Litt) a dawng a ni.

SJJTU  hnuaia University  Degree hrang hrang dawngtute leh zirlaite fuihna thu sawiin Mizoram Governor chuan hlawhtling turin hlawhchham huamin vawi tam tak chetchhuah a ngai thin tih a sawi a. Degree ropui tak tak te han neih chu thilchhuanawm tak ni mahse hlawhtlinna tak tak zawk erawh chu kan khawtlang, kan ram leh kan mihringpuite tan eng ang chiahin nge kan tangkai tih te leh eng anga nasa in nge kan thawhchhuah tih ang zawnga chhut zawk tur a ni a ti. Mizoram Governor chuan SJJTU lo indin dan te, a thil tum te leh mi tangkai tak tak an chherchhuah dan te a hriatin lawmawm a tih thu a sawi a. Chawimawi phu tak tak leh degree pek tlak mi chhuanawm tak tak zingah a vantlang tana a lo thawh ve tawhna avanga Honorary Doctorate Degree hlan a ni chu thinlung taka  a lawm thu a sawi a ni.

Governor Kummanam Rajasekharan hi a pian leh murna hmun, Kerela-ah chuan Vantlang rawngbawl hna, enkawltu mumal neilo naupang baihvai enkawl hna te leh mipui chanvo diktak haihchhuak tura  theihtawp chhuah thin tu leh  hmaruaitu lar takte zinga mi a ni a; heng a hnathawh leh hlawhtlinnaah te hian chawimawi phu ah ngaiin  Shri Jagdishprasad Jhabarmal Tibrewala University( SJJTU), Rajasthan chuan  vawiin khan an annual convocation-ah midangte rualin D.Litt(Honorary)  a pe ta a ni.

Governor Kummanam Rajasekharan hi 1952 December ni 23 khan Kerala thingtlang khaw pakhat, Kummanam-ah a lo pianga. A nu leh pa te chu Advocate V.K. Ramakrishna Pillai leh Pi. P. Parukkutty Amma te an ni. Amah hi zirna lamah chuan B.Sc(Botany) Degree leh PG( Journalism) Diploma nei a ni a. Journalist te ni tawhin sawrkar hna te a thawh hnuah vantlang rawngbawlna huangah a hun pumhlumin a inhmang chhunzawm a ni.