Ni hnih awh tur All Mizoram Village Council Conference, 2019 chu vawiin khan Pachhunga University College Auditorium-ah neih tan a ni a. Local Administration Department changtu Minister Pu K. Lalrinliana chu khuallian a ni.

Pu K.Lalrinliana chuan Mizoram puma VC member rual kalkhawmte chu khawmpui an neih mek hmang tangkaia Mizoram tana thil tha pawchhuak ngei turin a fuih a. Mizoram sawrkar chuan  Village Council dan thar siam tumin hma a la mek tiin SEDP ah pawh ziahlan a nih ang leh India danpui duh dan milin, Mizo hnam leh khawtlang nunzia ti bo chuang si lova VC te mawhphurhna ti pung tur leh dinhmun tha zawka an din theih nan hma lak mek a ni, a ti. Village Council ten Excluded Area Fund an dawng thuai dawn tih sawiin LAD Minister chuan heng fund an dawn te hi ngaihtuahna zau zawk pu chunga uluk taka hmang turin a chah a. An khaw than zelna tur thlira an khaw tana rotling siam tur leh tu leh fate than lenna tlaka  buatsaih turin sum leh pai an dawn te dik taka hmang turin a fuih.  

SEDP chu eizawnna ngelnghet neilo chhungkuaten eizawnna ngelnghet an neih theihna tura duan a ni a, VC te pawhin an khawtlang tana ruahmanna tha leh felfai kalpui a nih theih nan an inbuatsaih lawk a pawimawh a ni, Minister chuan a ti a. VC te chuan tun dinhmunah khawtlang inrelbawlna kawng hrang hrang - thubuai rem kawngah te, ram kang tur ven kawngah te, ran khuahkhirhna dan te, ram ngaw humhalh chungchangah  leh thil dangah mawhphurhna lian tak an neih hre thar leh turin a chah a. Dan lo a khaw din chungchang sawiin hei hi ram tana pawi thei a nih avangin VC ten mawhphurhna la a, enchiang a, khap thin tur leh din lui an awm a nih chuan sawrkar thuneitute hnenah hriattir thin turin a fuih a ni. Pu K.Lalrinliana chuan Mizoram Village Level Citizen Registration kalpui tum a nih thu sawiin anmahni khua theuhah tute nge chenga engnge an mamawh tih VC ten an hriat a tul, a ti a. Khaw mipuite mamawh hre chiang bertu an nih avangin sawrkarin mipui hamthatna tur ruahmmanna a siam dawna department-a thawkte hrilh hre tu leh rawtna thlentu ni thin turin Minister chuan kalkhawmte a fuih bawk a ni. 

Mizoram Village Council khawmpuilianah hawnna inkhawm LAD Director Pu R.S.Lalzamliana kaihhruaiah hian Mizoram pum atangin VC Member mi sanghnih chuang an kalkhawm a. All Mizoram Village Council Association President Pi Lalremsangi pawhin thu a sawi a ni. Chawhnu lamah LAD Joint Director Pu C.Lalthlamuana’n programme kaihruaiin Poshan Abhyan, Health Care (AB-PMJAY) leh bio-diversity management chungchang an zirho a ni.