Horticulture Department, Government of Mizoram buatsaihin vawiin khan Chapcharkut lo awm tur denchhenin Chapcharkut Flower Show chu Directorate of Horticulture Ground floor ah neih a ni a. Aizawl South-Ill MLA Prof. F. Lalnunmawia, Horticulture Development Committee Vice Chairman chu Khuallian niin flower show hi a hawng a. Lunglei South MLA Dr. K. Pachhunga, Bamboo Development Committee Vice Chairman pawhin he hun hi a  hmanpui a ni. Flower show-ah hian Mizoram Florist Association-te nen tangkawpin Pangpar khawi entirsiakna neih a ni.

Khuallian, Professor F. Lalnunmawia chuan Pangpar chin leh khawi chu Technology a innghat eizawnna tha leh changkang tak ni mek leh la ni zel tur a nih avangin University zirlaite leh zirchhuak tawh, thalai lehkhathiam, hna la neilo, helama tuite tan Horticulture Department-ten Skill Development training an pek thin chu zau zawk leh nasa zawka hmalak chhunzawm zel nise a duh thu a sawi a. SEDP hnuaiah mahni kea ding thei tura hmalakpui turin Chief Minister Pu Zoramthanga hova an inpeih reng thu a sawi bawk. 

Dr. K. Pachhunga pawhin thu sawiin Mizo hmeichhiate chu mahni inchhungkhurah thuthluang mai lova, Pangpar hmanga eizawnna hlawk tak an kalpui thin chu fakawm a tih thu a sawi a. Pangpar mawi tak takte, khawi chul hnua paih mai lova thil dang tangkai taka siam chhuah nana sawngbawl chhunzawm dan ngaihtuah pawimawh a tih thu MLA hian a sawi bawk.

He Pangparkhawi entirsiakna hi chi thum a then niin, lawmmante hi Prof. Lalnunmawia leh Dr. K. Pachhunga ten an sem a. Lawmman dawngtute chu:-

Mass Arrangement:

1st Prize            -              Pi Lallianthangi Bethlehem Veng

2ndPrize            -              Pi Vanlalzawni, Chaltlang

3rd Prize            -              Pi Vanlalzawni, Chaltlang

Artistic:

1st Prize            -              Pi Robuangi, Zarkawt

2nd Prize           -             Pi Liansangpuii, Tuikhuahtlang

3rd Prize           -              Pi RK Vanlalchhuangi

kebana:

1st Prize            -            Pi Liansangpuii, Tuikhuahtlang

2nd Prize           -            Pu Vanlalhruaia, Durtlang

3rd Prize           -             Pi Zaithangi, Khatla

Chapchar kut denchhen hian Aizawl City Park ah March 6 atanga ni 8 chhungin pangpar zawr chhuahna hun siam a ni dawn a ni.