Vawiin khan ATMA,Mamit District leh KVK, Lengpui buatsaihin ni 2 awh tur District Kisan Mela chu Community Hall, Lengpuiah hawnna hun neih a ni a. He hun hi Pu Thlamuana, Secretary, Fisheries Deptt chuan Khuallian niin a hmanpui.

Khuallian chuan Loneitute'n an tharchhuah pholanna hun remchang ATMA leh KVK te'n an buatsaih chu lawmawm a tih thu a sawi a. Loneitute'n eizawnna khawp an tharchhuah reng theih nan an harsatna chu ATMA leh KVK mithiamte hnenah thlen zel turin a chah a ni.

He hun kaihruaitu Pu RK Nithanga, Director, SAMETI chuan Mela thupui 'Subsistence to Business Oriented Farming' chu sawihawnna hun neiin Loneituten mahni eikhawp chauh thar chhuak lova eizawnna khawp tharchhuak thei turin kalkhawm mipuite a chah bawk.

He hunah hian kum 2017-2018 chhunga loneitu hlawhtling, Mamit District huamchhung a mi pali(4) hnenah leh Farmers Group pakhat(1) hnenah lawmpuina certificate leh pawisa fai pek a ni.

Naktuk hian loneitute pualin Vety, Agri leh Horti lamah Free Clinic buatsaih an tum bawk.