Mizorama cham mek Bangladesh Minister for Water Resources Pu Muhammad Nazrul Islam chuan nimin tlai khan Mizoram Governor Lt.Gen Nirbhay Sharma chu a chenna Raj Bhawan-ah a tlawh.

Mizoram Governor chuan hmarchhak bial leh Bangladesh hmasawnna a inzawm tlat thu sawiin Bangladesh nena inkalpawhna leh insumdawn tawnna tha tak neih theih chuan ram pahnih tan a hlawkthlak hle ang, a ti.

Bangladesh Minister chuan an lui-kawng (water ways) te hman tangkai chu an ram Prime Minister pawhin project pawimawh ber zingah dahin nasa takin hma an lak mek thu Governor a hrilh a. He project a puitlin hunah chuan heng lui-kawng hmangin sumdawnna bakah zinmi te tan a tangkai hle dawn a ni, a ti. Minister Pu Islama hi Deputy High Commissioner for Bangladesh Pu Zokey Ahad-in a rawn tawiawm a ni.