Vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Central YMA hotute a chenna Raj Bhawan-ah leng tura sawmin Mizoram mipui leh khawtlang hmasawnna tura an hmalakna hrang hrangte an sawiho.

Mizoram Larsap chuan CYMA President Pu Lalbiakzuala hova hruaitu lo kalte hnenah Mizoten vaihlo, zu leh drugs tel lova nunphung hrisel zawk an uar deuh deuh theih nan mipuite zirtir leh hrilhriatna kawngah YMA chuan chak zawka hma la turin a ngen a. Mizo mipuite rilru changkanna leh zirna lamah pawh an thiam theihzia a hmuhin nunphung hrisel zawk zawmna chang an hriat hunah phei chuan Mizoram chu state zawng zawng entawntlak a ni thei ang, a ti. Chite lui tihfai leh humhalh hna chungchangah CYMA chu tel ve turin leh he hmalakna hi thlawp tlat turin a chah bawk a, YMA-in Chite lui humhalh hna hi a ngaih pawimawhte zinga a neih chuan Mizo mipui zawng zawngten an ngai pawimawh ngei ang tih a beisei thu a hrilh a ni.

CYMA hruaitute chuan Mizoram Larsap-in an hmalaknate a phurpuina leh thlawp thinnaah lawmthu an hrilh a, Larsap-in an hmachhawp tur a lo sawite chu theihtawpin an bawhzui tur thu an hrilh a. CYMA-in football tournament an buatsaih hunah pawh hun rawn hmanpui turin an sawm nghal a ni.