Tuirial bialtu MLA Pu Hmingdailova Khiangte, Parliamentary Secretary chuan vawiin khan Kawnpui Town Hall-ah Zotlang Cultural Club-in Silver Jubilee an lawmnaah Khuallian niin a telpui a, Silver Jubilee Lungphun a hawng nghal bawk.

Kum 1992 a din, Zotlang Cultural Club kum 25 tlin puala lawmna inkhawm neihah Khuallian chuan Mizo hnam a boral mai lohna turin Culture leh Tradition vawn nun reng chu kan tihmakmawh a nih thu sawiin, a tihlar tur pawhin theihtawp chhuah a tul thu a sawi a. Mizo puan ze mawi tak te chu Mizo hnam chawi lartu a ni mek a, hnamdangte pawhin an duh em em a nih avangin Handloom lama Mizo puan thar chhuah tam lamah tan kan lak a ngai a ni a ti a. Zo hnahthlak hrang hrang te hi ram hran hranah awm mah ila Culture hi min phuar khawmtu a ni a a ti a. Hemi kawnga Art & Culture Dept. leh District huapa Mizo Cultural Organization awm te bakah khaw hrang hranga Cultural Club din ten Culture vawn him nan leh hmasawnna tura hma an la chu lawmawm a tih thu a sawi a ni.

Khualzahawm Pu Lalhmingliana, SDO(C) Kawnpui pawhin thu sawiin, Cultural Club tam tak zingah Zotlang Cultural Club ten kum 25-na lawm thei an ni chu lawmawm a tih thu a sawi a, hnam dang te nen pawh Culture hmang hian inpumkhatna siam thiam hi a tul tawh tak zet a ni a ti.

He hunah hian Kawnpui-a Officer leh mi pawimawh engemaw zat telin, Hnam lam chi hrang hrang en tir a ni.

Attachment

  • Loading attachment...