Vawiin khan Mizoram Governor Lt Gen (Rtd) Nirbhay Sharma, PVSM, UYSM, AVSM, VSM leh Central Young Mizo Association (CYMA) hruaitute chu Raj Bhawan-a a pisaah an inkawm a; tunhnaia CYMA ten LPG tih chingpen chungchanga an hmalakna leh ruihlo do an kalpui mek dan an sawiho.

Mizoram Governor Pu Nirbhay Sharma chuan CYMA hmalaknate fakin ram leh hnam tana an inpekna leh thawh zelna turah duhsakna a hlan a. Mizo thlai tam zawkin sipai an zawm theih nan training mumal taka pek chungchangah YMA-ten hma la se a duh thu a hrilh a; Mizorama Sainik School din turah zirlai mipa leh hmeichhia lak ve ve tum a nih thu sawiin hei hi rampumah a hmasa ber a ni dawn, a ti. Mizo zirlai leh thalaiten ramchhung state dangte tlawh a, hnam hrang hrang ziarangte an hriat theih nan ‘Bharat Darshan’ neih tha a tih thu a sawi bawk. Mizoramah remna leh muanna a awm a, Mizote chu hnam leh khawtlang tangrual tak, ziak leh chhiar tamna state a ni a, duhthusama boruak sik leh sa nuam, thlai eng pawh that duhna hmun a ni bakah a chhunga mihring cheng an tam lo bawk nen khawvel hriat phaka thleng sang thei hnam a ni, a ti. Hriselna, zirna, tawng dang thiam belh leh zuk leh hmuama insum chungchang mipuite hrilhhriat zel turin CYMA hruaitute a chah.

CYMA hruaitute chuan an hmalakna zarah Mizorama gas harsatna pawh sutkian mek a nih thu te, ruihlo tawlhru thin zawnchhuah te, thalaite tana eizawnna kawng tur sialsak te chu an ngaih pawimawh hle thu Governor an hrilh a. Mizoram leh Bangladesh leh Myanmar ramri venna hna leh checkgate te pawh khauh zawka kalpui ni thei se an duh thu an hrilh bawk.

Vawiina Mizoram Governor nena inkawmnaah hian CYMA President Pu Lalbiakzuala, Vice-President Pu Vanlalruata, General Secretary Pu Lalhmachhuana, Treasurer Pu J.Lalsailova leh Fin. Secretary Pu Lalrochuanga Pachuau te an tel a ni.