Nimin tlai khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Mizoram Kohhran Hruaitute Committee-te chu a chenna Raj Bhawan-ah leng tura sawmin kohhran anga khawtlang nun siamthatna kawnga an hmalaknate an sawiho. 

Mizoram Larsap chuan MKHC Chairman Rev. Lalzuithanga hova Committee Member lo kalte chu a sawmna ngai pawimawh a Raj Bhawan-ah an rawn lenglut chu lawmawm a tih thu a hrilh a. Mizoram leh a mipuite hmasawnna kawngah kohhran chuan nasa takin hna a thawk thin leh a tha zawnga mipuite hruaina kawngah nghawng nei lian ber an ni thei tih sawiin Mizoten vaihlo, zu leh drugs tel lova nunphung hrisel zawk an uar deuh deuh tura zirtir chu kohhran huamchhungah pawh nasa lehzuala sawi uar leh tanlak a tul thu a sawi. Hriselna leh zirna kawngah chak taka mipuite hruai thei kohhrante chuan environment chungchang pawh ngai pawimawh zual a, Chite lui tihfai leh humhalhna kawngah pawh thawhpuiah a sawm bawk a ni. 

MKHC Member-te chuan Mizoram Larsap-in an hmalaknate lo hria a, Mizoram siamthatna kawngah thawhho tura a sawmna chu lawmawm an tih thu an hrilh a. Mizote hriselna leh thianghlimna kawngah kohhran hmalakna hrang hrangte an hrilh bakah Larsap-in Mizo thalaite hmakhua ngaiin skill development leh intodelh kawngah theih tawpin kohhrante an thlawp ang tiin an hrilh bawk. Mizoram Larsapin MKHC hruaitute inkawmna hun neihpui leh tura sawm chu an pawm bawk a ni.